Qazaqstan men Majarstan yntymaqtastyǵyn nyǵaıtýǵa daıyn: jańa jobalar men ınvestıtsııalar
ASTANA. KAZINFORM — Oljas Bektenov pen Majarstan Prezıdenti Tamash Shýıok ekonomıkalyq yntymaqtastyq pen kelisimderdi joǵary deńgeıde júzege asyrý máselelerin talqylady. Bul týraly Úkimettiń baspasóz qyzmeti málim etti.
Qazaqstan Respýblıkasynyń Premer-mınıstri Oljas Bektenov pen Qazaqstanǵa alǵash ret resmı saparmen kelgen Majarstan Prezıdenti Tamash Shýıok kelissózder barysynda joǵary deńgeıde qol jetkizilgen ýaǵdalastyqtardy júzege asyrý josparlaryn talqylady.
— Saýda-ekonomıkalyq jáne ınvestıtsııalyq yntymaqtastyqty damytýǵa, kólik-tranzıttik, aýyl sharýashylyǵy salalardaǵy ózara is-qımyl, jasandy ıntellekt pen tsıfrlandyrýdy engizý jáne basqa da ózekti máselelerge nazar aýdaryldy, — delingen habarlamada.
Kezdesýge qatysýshylar ózara saýdany odan ári arttyrýdyń zor múmkindigin atap ótti. Qazaqstan Majarstanǵa eksportty 95 taýar túri boıynsha arttyrýǵa daıyn ekenin jetkizdi. Sondaı-aq jańadan qurylǵan Qazaqstan-Majarstan ınvestıtsııalyq qory birlesken jańa jobalardy júzege asyrýdyń mańyzdy quralyna aınalady.
Seriktestiktiń negizgi baǵyttarynyń biri — kólik-logıstıka salasy. Qazaqstannyń Eýropalyq Odaqqa eksportyn keńeıtý maqsatynda Býdapesht aglomeratsııasynda ıntermodaldy júk termınalyn salý boıynsha birlesken jobany júzege asyrý perspektıvalary talqylandy.
Sonymen qatar JI tehnologııalaryn engizý salasyndaǵy yntymaqtastyqtyń strategııalyq basymdyǵy atap ótildi.
Kezdesý qorytyndysy boıynsha Premer-mınıstr Oljas Bektenov Qazaqstan Úkimeti joǵary deńgeıde qol jetkizilgen barlyq ýaǵdalastyqtyń sapaly oryndalýyn erekshe baqylaýǵa alatynyn basa aıtty.
Óz kezeginde, Majarstan Prezıdenti Tamash Shýıok Qazaqstandaǵy ınvestıtsııalyq ahýaldy joǵary baǵalap, qazaq-majar yntymaqtastyǵyn odan ári tereńdetýge múddeli ekenin jetkizdi.
Eske sala keteıik, Majarstan Prezıdenti Tamash Shýıok elimizge resmı saparmen keldi. Ol Aqordada ótken BAQ ókilderine arnalǵan brıfıngte Qazaqstan men Majarstan halyqaralyq deńgeıde birlese jumys isteýge keliskenin málimdegen edi.