Qazaqstan men Majarstan halyqaralyq deńgeıde birlese jumys isteýge kelisti

ASTANA. KAZINFORM — Álemde túrli qaqtyǵystardyń kóbeıýi Qazaqstandy da, Majarstandy da alańdatady. Bul týraly Aqordada elimizge resmı saparmen kelgen Majarstan Prezıdenti Tamash Shýıokpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.

— Aımaqtyq jáne jahandyq mańyzy bar ózekti máseleler boıynsha pikir almastyq. Álemdegi geosaıası ahýaldyń ýshyǵýy, túrli qaqtyǵystardyń kóbeıýi eki eldi de alańdatady. Biz barlyq túıtkildi BUU Jarǵysyna sáıkes beıbit jáne saıası dıplomatııalyq jolmen sheshý qajet dep sanaımyz. Osy rette halyqaralyq deńgeıde bir-birimizge qoldaý bildirip, birlese jumys isteýge kelistik, — dedi Qasym-Jomart Toqaev.

Memleket basshysy búgingi kelissózder jemisti bolǵanyn basa aıtty.

— Qazaqstan men Majarstan arasyndaǵy baılanys qarqyndy damyp kele jatyr. Ózara tıimdi yqpaldastyǵymyz jańa ári sapaly deńgeıge kóteriledi dep senemiz. Qol jetkizilgen barlyq kelisimder oıdaǵydaı oryndalatynyna kúmánim joq. Baýyrlas halyqtarymyzdyń yntymaǵy berik bolsyn, elderimiz ósip-órkendeı bersin, — dedi Prezıdent.

 

Aıta keteıik, Qasym-Jomart Toqaev majarlyq áriptesimen keńeıtilgen quramdaǵy kelissóz barysynda Qazaqstanda birlesken jobalardy iske asyrýǵa nıetti majarlyq kásipkerlerge tolyq qoldaý kórsetiletindigin aıtqan bolatyn.

Sonymen qatar Qazaqstan men Majarstan ózara taýar aınalymyn 1 mlrd dollarǵa jetkizbek.