Qazaqstan men Majarstan bilim salasynda ózara túsinistik týraly memorandýmǵa qol qoıdy
Qazaqstan Prezıdenti men Majarstan Premer-mınıstri eki memlekettiń resmı delegatsııalarynyń qatysýymen keńeıtilgen quramda kelissóz júrgizdi, dep habarlaıdy Kazinform Aqordaǵa silteme jasap.
Qasym-Jomart Toqaev Qazaqstan men Majarstannyń tarıhı tamyrlastyǵy jáne tyǵyz baılanystary búginde eki el arasyndaǵy yntymaqtastyqtyń tereńdeı túsýine negiz bolǵanyn atap ótti.
– Qazaq pen majar – ejelden syılastyǵy jarasqan týystas, dostas halyqtar. Eki eldiń tili, salt-dástúri men mádenıeti uqsas. Orta ǵasyrlarda Torǵaı dalasynan Eýropaǵa qonys aýdarǵan qypshaq taıpalarynyń urpaqtary búginde Majarstan aýmaǵynda ómir súrip jatyr. Biz muny maqtan tutamyz. Birlesken kúsh-jigerimizdiń arqasynda qazaq-majar yqpaldastyǵy barlyq salada qarqyndy damýda. Buǵan, qurmetti Premer-mınıstr myrza, Siz ólsheýsiz úles qosyp kelesiz. Biz baýyrlastyǵymyzdy, ózara tıimdi qarym-qatynasty odan ári tereńdetýge múddelimiz. Búgingi kelissózder ekijaqty strategııalyq seriktestikti odan ári damytýǵa tyń serpin beredi dep senemin, – dedi Prezıdent.
Qasym-Jomart Toqaev Qazaqstan men Majarstan arasynda ekijaqty yntymaqtastyqty odan ári damytý úshin jaqsy ınstıtýtsıonaldy negiz bar dep sanaıdy. Memleket basshysynyń pikirinshe, Ekonomıkalyq yntymaqtastyq jónindegi úkimetaralyq komıssııa men Іskerlik keńes eki eldiń saýda qatynastaryn damytýda belsendi ról atqarýy kerek.
– Geosaıası shıelenisterge qaramastan, byltyr taýar aınalymy 20 paıyzdan astam ósti. Taıaý bolashaqta bul kórsetkishti 1 mıllıard dollarǵa deıin jetkizýge tolyq múmkindigimiz bar ekenine senimdimin, – dedi Qazaqstan Prezıdenti.
Taraptar energetıka, kólik, logıstıka, metallýrgııa, óńdeý ónerkásibi, aýyl sharýashylyǵy, farmatsevtıka, tamaq ónerkásibi jáne týrızm sııaqty salalardaǵy baılanystardy damytýǵa ózara múddeli ekenin bildirdi.
Sonymen qatar kelissóz barysynda eki eldiń zań shyǵarýshy organdarynda jumys isteıtin dostyq toptary arqyly parlamentaralyq baılanysty nyǵaıtýdyń mańyzdylyǵy aıtyldy. Sondaı-aq BUU, EQYU, TMU jáne túrli halyqaralyq platformalar aıasyndaǵy ózara yqpaldastyq perspektıvalary qarastyryldy.
Budan bólek, Memleket basshysy eki eldiń gýmanıtarlyq baılanystaryn nyǵaıtý máselesine de toqtaldy. Búgin Astana kósheleriniń birine majar ultynyń kórnekti aqyny Shandor Petefıdiń esimi beriledi. Bul – Qazaqstan men Majarstan arasyndaǵy tyǵyz dostyq qatynastardyń taǵy bir aıqyn dáleli.
Óz kezeginde Vıktor Orban qurmetpen qarsy alǵany úshin Qasym-Jomart Toqaevqa jáne baýyrlas Qazaqstan halqyna alǵys aıtty.
– Qurmetti Prezıdent myrza! Biz Qazaqstanǵa árqashan erekshe qýanyshpen kelemiz. Biz munda sońǵy ret pandemııaǵa deıin bolǵan edik. Sol kezdiń ózinde ekijaqty qarym-qatynasymyz óte tabysty damydy. Biraq koronavırýs barlyq baılanystarymyzdyń qarqynyn tejedi. Biz búgin ózara yqpaldastyǵymyzǵa tyń serpin berý úshin keldik. Orta Azııa aımaǵynda bizdi Qazaqstanmen ǵasyrlar boıǵy tarıhymyz baılanystyrady. Sondyqtan sizderdiń árbir jetistikterińizge qýanamyz. Qazaqstan – tabysty damyp kele jatqan ǵajap el. Men árqashan Qazaqstannan úlken ásermen qaıtamyn, – dedi Majarstan Premer-Mınıstri.
Kelissóz qorytyndysy boıynsha bilim salasyndaǵy ózara túsinistik týraly memorandýmǵa qol qoıyldy.
