Qazaqstan men Majarstan arasyndaǵy taýar aınalymy 350 mln dollarǵa jetti
ASTANA. QazAqparat - Qazaqstan men Majarstan arasyndaǵy taýar aınalymy 350 mıllıon AQSh dollaryna jetti. Bul týraly OKQ-da ótken baspasóz máslıhatynda Majarstannyń Qazaqstandaǵy elshisi Andrash Baranı málim etti, dep habarlaıdy «QazAqparat» HAA tilshisi.
«Men bıylǵy jyl bizdiń eki eldiń saýda-ekonomıkalyq seriktestigi turǵysynda óte tabysty bolǵanyn atap ótkim keledi. 2017 jyldyń 6 aıynyń qorytyndysy boıynsha, biz ózara taýar aınalymyn eselep, 350 mıllıon AQSh dollarlyq kórsetkishke jetkizip otyrmyz. Sondyqtan, 2017 jyldyń sońyna qaraı budan da jaqsy nátıjegen jetemiz degen úmittemiz», - deıdi ol Astanada ótken baspasóz máslıhatynda.
2016 jyldyń statıstıkalyq kórsetkishterine sáıkes, Qazaqstannyń taýar aınalymynyń ósimi turǵysynan kórsetkishi 16 paıyzǵa - 188 mln AQSh dollaryna jetken birden-bir ekonomıkalyq seriktesi - Majarstan bolǵan.
Aıta ketsek, ótip bara jatqan 2017 jyl eki el arasyndaǵy yntymaqtastyqqa tyń serpin berip otyr. Majarstan «Astana EKSPO-2017» halyqaralyq mamandandyrylǵan kórmesine de belsendi qatysyp, jasyl tehnologııalar salasyndaǵy jańa jetistikterin usynǵan edi. Tańdalǵan taqyrypty ashýda Majarstan ekinshi orynǵa ıe boldy. Kórmeniń ótý barysynda majarlyq pavılonǵa 300 myńǵa jýyq adam kelgen.
