Qazaqstan men Majarstan arasynda sottalǵan adamdardy berý týraly shart qabyldandy - Parlament

ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasy men Majarstan arasyndaǵy sottalǵan adamdardy berý týraly shartty ratıfıkatsııalaý týraly» QR Zańy qabyldandy. Atalǵan shart 2014 jyldyń 3 maýsymynda Býdapeshtte jasalǵan bolatyn.

Kelisim ýaǵdalasýshy taraptardyń sottalǵan azamattaryn ózderi azamaty bolyp tabylatyn memlekette jazasyn odan ári óteý úshin berý máselelerin retteýge baǵyttalady. Sonyń ishinde tulǵalardy berýde ol sol eldiń azamaty bolýy jáne oǵan jasalǵan úkim naqty kúshine engen bolýy shart. Eger ýaǵdalasýshy taraptardyń biri ondaı ustap berý el egemendigine, qaýipsizdigine, qoǵamdyq tártipke zalalyn tıgizedi dep sanaıtyn bolsa, onda ustap berýden bas tartylýy múmkin.

«Shart Majarstan sottary bas bostandyǵynan aıyrýǵa sottaǵan Qazaqstan Respýblıkasynyń azamattaryn jáne Qazaqstan Respýblıkasynyń sottary bas bostandyǵynan aıyrýǵa sottaǵan Majarstan azamattaryn budan ári jazasyn óz Otandarynda óteý máselesin reglamentteıdi. Eger de taraptardyń bireýi sottalǵan adamdy eline qaıtarý týraly sheshim sol eldiń ulttyq zańnamasyna qaıshy bolyp, qoǵamdyq tártibine zalalyn tıgizetinin alǵa tartsa, onda sottalǵan adamdardy berýden bas tartylýy múmkin», - deıdi QR Bas prokýrorynyń birinshi orynbasary Iogan Merkel. Zań jaǵymsyz áleýmettik-ekonomıkalyq saldarǵa soqtyrmaıdy.

Parlament qabyldaǵan Zań Memleket basshysynyń qol qoıýyna joldanady.