Qazaqstan men Marokko arasyndaǵy yntymaqtastyqtyń bolashaǵy talqylandy - SІM
NUR-SULTAN. QazAqparat - Syrtqy ister mınıstri Beıbit Atamqulov Qazaqstan Respýblıkasyndaǵy Marokko Koroldiginiń Elshisi Abdeldjalıl Saýbrıdi qabyldady, dep habarlaıdy QazAqparat QR SІM baspasóz qyzmetine silteme jasap.
Taraptar eki memleket arasyndaǵy, sondaı-aq aımaqtyq jáne halyqaralyq uıymdar sheńberindegi ózara tıimdi yntymaqtastyqty odan ári damytý joldaryn talqylaýǵa múmkindik beretin dostyq jáne turaqty qatynastardyń sıpatyn atap ótti.
«Biz Marokkony arab álemindegi jáne Soltústik Afrıka aımaǵyndaǵy jetekshi memleketterdiń biri dep qarastyramyz jáne Koroldikpen qatynastardy jan-jaqty damytýǵa múddelimiz», - dedi SІM basshysy.
Qazaqstan men Marokko arasyndaǵy ekijaqty qarym-qatynastardyń qarqyndy damýy atap ótildi. Eki memleket Islam yntymaqtastyǵy uıymynyń belsendi qatysýshylary bolyp tabylady. Qazaqstandyq tarap Marokkoǵa túrli halyqaralyq alańdarda usynylǵan QR bastamalaryn qoldaǵany úshin alǵys bildirdi.
Marokkalyq dıplomat Qazaqstan-Marokko qarym-qatynastaryna degen senimdilik deńgeıin rastap, Marokko eli Qazaqstandy Ortalyq Azııa aımaǵynda dostas el retinde joǵary baǵalaıtynyn sendirdi.
Marokkonyń Elshisi Syrtqy ister jáne halyqaralyq yntymaqtastyq mınıstri Nasser Býrıtanyń atynan Qazaqstan SІM basshysyna Koroldikke saparmen kelip qaıtý shaqyrýyn jetkizdi. Atalǵan sapar Nur-Sultan men Rabat arasyndaǵy jan-jaqty qatynastardy odan ári damytýǵa aıtarlyqtaı serpin beredi, dep atap ótti Elshi.
Kezdesýde Marokkomen saýda-ekonomıkalyq saladaǵy ózara tıimdi yntymaqtastyqty damytý máseleleri talqylandy. Eki taraptyń da taý-ken metallýrgııa ónerkásibiniń uqsas salalary bar - fosfor jáne qorǵasyn kenderi, tústi jáne sırek metaldar. Ǵylymı jáne ınjenerlik áleýettiń ashylmaǵan múmkindikteri bar.
Aýyl sharýashylyǵy - ekijaqty kún tártibindegi mańyzdy taqyryp. Qazaqstan astyqtyń jáne basqa da aýylsharýashylyq ónimderiniń iri óndirýshisi biri bolyp tabylady.
Taǵy bir talqylanǵan máseleniń biri Qazaqstan men Marokko arasyndaǵy týrıstik yntymaqtastyqty damytý. Belgili bolǵandaı, Marokko Soltústik Afrıka aımaǵy boıynsha týrızm salasynda kóshbasshy bolyp tabylady jáne jyl saıyn atalǵan elge 11 mıllıonnan astam týrıst keledi, olardyń ishinde myńdaǵan qazaqstandyqtar da bar.
Sonymen qatar, oryn alǵan kezdesýde mádenı-gýmanıtarlyq yntymaqtastyq máseleleri talqylandy.
