Qazaqstan men Marokko arasynda qylmyskerlerdi ustap berý tártibi jeńildeıdi
ASTANA. KAZINFORM – Parlament Májilisiniń qaraýyna Qazaqstan men Marokko arasyndaǵy ustap berý jáne qylmystyq ister boıynsha ózara quqyqtyq kómek, sondaı-aq sottalǵan adamdardy berý týraly úsh kelisimdi ratıfıkatsııalaýǵa arnalǵan zań jobalary kelip tústi.
- Atalǵan úsh zań jobasy Qazaqstannyń halyqaralyq sharttary týraly zańyna sáıkes ázirlendi. Bul qujat jobalary Qazaqstan men Marokko Koroldigi arasyndaǵy qylmyskerlerdi ustap berý, sottalǵan adamdardy berý jáne qylmystyq ister boıynsha ózara quqyqtyq kómek salasyndaǵy kelisimderdi ratıfıkatsııalaýǵa baǵyttalǵan. Osy úsh baǵyt boıynsha eki el arasyndaǵy yntymaqtastyqty nyǵaıtý eskerilgen, - dedi depýtat Snejanna Imasheva Májilistiń jalpy otyrysynda
Onyń aıtýynsha, atalǵan qujattar eki eldiń qylmyspen kúrestiń tıimdiligin arttyrady.
- Májilistiń Zańnama jáne sot-quqyqtyq reforma komıteti atalǵan jobalary boıynsha qorytyndy ázirleýge daıyn, - dedi depýtat.
Budan buryn habarlanǵandaı, búgin Májilistiń jalpy otyrysynda depýtattar «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zańnyń jobasyn qaraýǵa qabyldady.