Qazaqstan men Malta qaı salalarda yntymaqtastyqty arttyrady
ASTANA. KAZINFORM – Eýropadaǵy qaýipsizdik jáne yntymaqtastyq uıymynyń Іs basyndaǵy tóraǵasy – Maltanyń Syrtqy, eýropalyq ister jáne saýda mınıstri Ien Borch alǵash ret Qazaqstanǵa resmı saparmen keldi. Sapar aıasynda ol QR Premer-Mınıstriniń orynbasary – Syrtqy ister mınıstri Murat Nurtileýmen kelissóz júrgizdi.
«Bizdiń elimiz eleýli demokratııalyq jetistikterge jetip, Ádiletti Qazaqstandy qurýdyń saraly jolynda. Búgingi sapardy Prezıdent Q.Toqaev bastaǵan irgeli saıası, áleýmettik jáne ekonomıkalyq reformalardy qoldaýynyń jarqyn belgisi dep sanaımyz. Tuǵyry bekem, ekonomıkasy qýatty, halyqaralyq sahnadaǵy bedeli keńinen moıyndalǵan Malta Eýropalyq odaqtaǵy Qazaqstannyń mańyzdy ári senimdi seriktesi. Osydan 31 jyl buryn elderimiz arasynda dıplomatııalyq qatynas ornatyldy. Sońǵy kezde Astana men Vallettanyń saıası dıalogy ekpindi túrde damyp keledi», - dedi Murat Nurtileýov kezdesý qorytyndysy boıynsha ótken brıfıngte.
Qazaqstandyq mınıstr eki eldiń ekonomıkalyq jáne mádenı-gýmanıtarlyq yntymaqtastyǵynyń da bolashaǵy zor ekenin atap ótti. Ótken jyldary Qazaqstan-Malta taýar aınalymy 250 mln dollar bolǵan.
«Saýda-ekonomıkalyq áleýetimizdi tolyq paıdalaný maqsatynda, mınıstr Borchpen týrızm, óńdeý, jer qoınaýyn barlaý, teńiz logıstıkasy sııaqty perspektıvaly sektorlar boıynsha jumysty jandandyrýdy ýaǵdalastyq. Qazaqstan azamattary úshin Eýropalyq Odaqtyń vızalyq rejımin jeńildetý máselesine bólek toqtaldyq. Bizdiń oıymyzsha, onyń oń sheshilýi san qyrly balanystardyń belsendi damýyna zor septigin tıgizer edi», - deıdi M.Nurtileý.
Sonymen birge, taraptar óńirlik jáne jahandyq kún tártibindegi ózekti taqyryptar boıynsha pikir almasqan.
«Jalpy, kóptegen halyqaralyq máseleler boıynsha elderimizdiń ustanymdary jaqyn nemese uqsas. Bıyl elimizdiń birqatar iri halyqaralyq uıymdarǵa tóraǵalyǵy barysyn ortaǵa saldyq. Helsınkı qorytyndy aktisi qabyldanǵanyna 50 jyldyǵy qarsańynda, Eýropadaǵy qaýipsizdik jáne yntymaqtastyq uıymynyń róli men bedelin arttyrý joldaryn qarastyrdyq», - dedi QR Syrtqy ister mınıstri.
