Qazaqstan men Malaızııa eksport pen ınvestıtsııalyq jobalardy keńeıtedi
ASTANA. KAZINFORM — Qazaqstan álemdegi halal ónimder men qyzmetterdi ilgeriletýge arnalǵan eń iri halyqaralyq platforma sanalatyn Malaysia International Halal Showcase (MIHAS) kórmesine alǵash ret qatysyp otyr.
Kórmede Qazaqstannyń ulttyq pavılonynda 20 otandyq kompanııanyń ónimi qoıylǵan. Bul elimizdiń halal segmentindegi eksporttyq zor áleýetiniń kórinisi.
MIHAS kórmesi jyl saıyn Kýala-Lýmpýr qalasynda ótedi jáne halal ónimderdi halyqaralyq naryqtarǵa shyǵarý, tájirıbe almasý men iskerlik baılanystar ornatýǵa arnalǵan jahandyq alań sanalady. Qazaqstannyń bul kórmege qatysýy eldiń halal ındýstrııasynyń jahandyq ekojúıesine belsendi qatysýǵa jáne Ońtústik-Shyǵys Azııa elderimen ekonomıkalyq baılanystardy nyǵaıtýǵa degen umtylysyn kórsetedi.
Malaızııaǵa saparynyń alǵashqy kúninde Qazaqstan Respýblıkasynyń Saýda jáne ıntegratsııa mınıstri Arman Shaqqalıev MIHAS-2025 halyqaralyq kórmesiniń ashylýyna qatysyp, ekonomıkalyq áriptestikti damytý jáne negizgi salalardaǵy yntymaqtastyqty tereńdetýge baǵyttalǵan birqatar ekijaqty kezdesýler ótkizdi.
Qazaqstan Respýblıkasynyń Saýda jáne ıntegratsııa mınıstri men Malaızııanyń Aýyl sharýashylyǵy jáne azyq-túlik qaýipsizdigi mınıstri Mohamad Sabý arasynda ekijaqty kezdesý ótti.
Kezdesý barysynda taraptar agroónerkásip kesheni, azyq-túlik qaýipsizdigin qamtamasyz etý jáne ónimderdi jańa naryqtarǵa shyǵarý salalaryndaǵy yqpaldastyqtyń perspektıvalaryn talqylady.
Sondaı-aq agroónerkásip keshenin damytý jáne Qazaqstannyń eksporttyq múmkindikterin keńeıtý máselelerine erekshe nazar aýdaryldy.
Qazaqstan tarapy aýyl sharýashylyǵy ónimderin básekege qabiletti baǵamen Malaızııa naryǵyna eksporttaýǵa daıyn ekenin málimdep, JAKIM uıymynyń qazaqstandyq halal standarttaryn moıyndaýyn erekshe atap ótti. Sonymen qatar, sanıtarlyq jáne veterınarlyq kelisimder, jańa eksporttyq baǵyttardy ashý jáne ónimdi qaıta óńdeý salasyndaǵy birlesken ınvestıtsııalar máseleleri qarastyryldy.
Integratsııalanǵan logıstıkalyq dálizderdi damytý, sonyń ishinde Transkaspıı halyqaralyq kólik baǵdary men eki el arasynda tikeleı áýe qatynasyn ornatý múmkindikteri basty nazarda boldy.
Malaızııa tarapy aýyl sharýashylyǵy salasyndaǵy ınnovatsııalar men tehnologııalar almasýǵa, sondaı-aq akademııalyq jáne ǵylymı-zertteý baǵdarlamalaryn damytýǵa qyzyǵýshylyq bildirdi.
«Azyq-túlik qaýipsizdigine qatysty jahandyq syn-qaterler jaǵdaıynda Qazaqstan men Malaızııanyń birlesken kúsh-jigeri eki el úshin de ornyqty damý men turaqtylyqtyń kepili bolmaq», - dep atap ótti mınıstrler.
Sol kúni QR Saýda jáne ıntegratsııa mınıstri Malaızııanyń Ulttyq saýda jáne ónerkásip palatasy (NCCIM) prezıdenti N. Gobalakrıshnannyń basshylyǵymen uıym ókilderimen kezdesý ótkizdi.
Kezdesý barysynda saýda aınalymyn ulǵaıtý, logıstıkany damytý, tsıfrlandyrý, jasyl energetıka, hımııa ónerkásibi men tamaq ónerkásibi sııaqty yntymaqtastyqtyń negizgi baǵyttary talqylandy. Halal ónimderin ilgeriletý perspektıvalaryna jáne birlesken ınvestıtsııalyq jobalardy júzege asyrýǵa erekshe nazar aýdaryldy.
Qazaqstan tarapy Malaızııanyń Ońtústik-Shyǵys Azııa naryǵyna shyǵý úshin strategııalyq hab retindegi rólin atap ótip, malaızııalyq kompanııalardyń Qazaqstan men Eýrazııalyq ekonomıkalyq odaq elderindegi jobalarǵa qatysý múmkindikterin usyndy.
Taraptar Qazaqstan-Malaızııa iskerlik keńesiniń jumysyn qaıta jandandyrý jáne onyń kelesi otyrysyn 2026 jyly Qazaqstanda ótkizý týraly kelisimge keldi. Bul otyrysta jańa birlesken jobalar usynylatyn bolady.
«Biz NCCIM uıymy Qazaqstan men Malaızııa isker toptarynyń arasyndaǵy mańyzdy kópirge aınalyp, saýda men ınvestıtsııa úshin jańa múmkindikterge jol ashady dep senemiz», - dedi Qazaqstan Respýblıkasynyń Saýda jáne ıntegratsııa mınıstri Arman Shaqqalıev.
Aıta keteıik, qazaqtyń ulttyq taǵamdary Malaızııadan kelgen tóreshini tańǵaldyrdy.