Qazaqstan men Malaızııa arasyndaǵy saýda aınalymy 60 %-ǵa artty
Búgingi kezdesýge Malaızııanyń ár túrli salalarynan 12 kompanııanyń ókilderi keldi.
«Malaızııa bıznes qaýymdastyǵy Qazaqstanǵa malaızııalyq kompanııalardyń tanymaldylyǵyn arttyrý úshin keldi. Malaızııa ókilderi Qazaqstanda ekonomıkalyq strategııalyq áriptesterdi tabý úshin, Qazaqstanǵa eksporttalatyn taýar kólemin ulǵaıtýdy kózdep otyr. Eki el bıznes, týrızm, ıslam qarjylandyrý, bilim jáne tsıfrlyq tehnologııalar salasynda áriptestik ornata alady», - dedi MATRADE eksport jáne halyqaralyq saýda bóliminiń aǵa dırektory Muhammad Mustafa Abdýl Azız. 
Onyń aıtýynsha, qazir qos el arasynda taýar aınalymy artyp keledi.
Máselen 2017 jyly taýar aınalymy 60%-ǵa artyp, 80 mln AQSh dollaryna jetti.
Malaızııanyń Qazaqstandaǵy elshisi Saıd Bakrı malaızııalyqtardyń Qazaqstan naryǵyn zertteýge kiriskenin aıtty. Byltyrdyń ózinde EXPO-2017 kórmesine 320 malaı kompanııasy qatysqan.
Almaty qalalyq kásipkerlik palatasy apparatynyń basshysy Nurlan Qabyshtaev malaı iskerlik ókilderin Qazaqstandaǵy bıznes júrgizý múmkindikterimen tanystyrdy.
Aıta ketsek, 30 qazanda Almatyda Qazaqstan-Malaızııa bıznes forýmy ashylady. Atalǵan sharany Qazaqstan-Malaızııa iskerlik keńesi uıymdastyrady.
Osydan 1 aı buryn Almatyda ótken «KEOGE» - «Munaı jáne gaz» qazaqstandyq halyqaralyq munaı jáne gaz kórmesi aıasynda Malaızııadan 14 kompanııa delegat bolyp kelgen edi.
Malaızııa memleketi Qazaqstan táýelsizdigin alǵashqylardyń biri bop moıyndaǵan. 2014 jyly Memleket basshysy Nursultan Nazarbaevtyń Malaızııaǵa resmı saparynan soń qos tarap arasynda ekonomıkalyq-dıplomatııalyq áriptestikke jol qoıyldy. QR memlekettik paıdaly qazbalar qory boıynsha komıssııanyń habarlaýynsha, Qazaqstanda óndiriletin munaı qory 4,1 mlrd tonna shamasynda. Qurlyqtaǵy ken oryndaryn qosqandaǵy gaz kondensatynyń qory 300 mln tonnaǵa baǵalanyp otyr.
