Qazaqstan men Malaızııa arasynda tikeleı áýe reısteri artady
2024 jyly Qazaqstan men Malaızııa arasynda tikeleı áýe reısteri sany artady. Kazinform bul týraly Týrızm jáne sport mınıstrligine silteme jasap habarlaıdy.
Týrızm jáne sport mınıstriniń orynbasary Erjan Erkinbaev Air Asia H áýe kompanııasynyń bas dırektory Benıamın bın Ismaılmen jáne kompanııa ókilderimen kezdesý ótkizdi. Taraptar Qazaqstannyń týrıstik áleýetin damytý perspektıvasyn, jolaýshylar aǵynyn arttyrý josparyn jáne týrızmdi damytýǵa baǵyttalǵan birlesken jobalardy talqylady.
«Tikeleı reıster saıahatshylar úshin qolaıly jaǵdaı jasap qana qoımaı, elimizdi sheteldik týrısterge qoljetimdi etedi. Sonymen qatar týrıster sanynyń artýyna, kelý týrızminiń geografııasyn keńeıtýge jáne týrıstik bızneske jańa múmkindik ashady», - dedi Erjan Erkinbaev.
Onyń aıtýynsha, tikeleı reısterdiń ashylýy – ázirge tek birinshi kezeń.
Mınıstrliktiń málimetine súıensek, áýe reısteri eki el arasyndaǵy saýda-ekonomıkalyq baılanystardy damytýda sheshýshi ról atqarady. Olar iskerlik kelissózderdi jeńildetip, saýda men ınvestıtsııany yntalandyrady. Kýala-Lýmpýr men Almaty arasynda ashylatyn reıster aıasynda bıznes-týrızm aǵyny artady dep kútilýde. Bul tájirıbe men bilim almasýǵa yqpal etip, ınvestıtsııalaý múmkindikterin keńeıtedi.
«Óz kezeginde Air Asia ókilderi Kýala-Lýmpýr men Almaty arasynda 2024 jyldyń naýryzynan bastap aptasyna tórt reıs (seısenbi, beısenbi, senbi jáne jeksenbi) jıiligimen tikeleı turaqty jolaýshylar reısin iske qosýǵa nıetti ekenin jetkizdi.
Áýe kompanııasy ókilderiniń aıtýynsha, bul qadam eki el arasyndaǵy týrıstik, saýda-ekonomıkalyq jáne ınvestıtsııalyq yntymaqtastyq úshin jańa múmkindikter ashpaq», - delingen vedomstvo aqparatynda.
