Qazaqstan men Makedonııa ınvestıtsııalardy ózara kótermeleıtin bolady - Senat
ASTANA. QazAqparat - Búgin Parlament Senaty Ekonomıkalyq saıasat, óńirlik damý jáne kásipkerlik komıtetiniń keńeıtilgen otyrysy bolyp ótti. Onda «Qazaqstan Respýblıkasynyń Úkimeti men Makedonııa Respýblıkasynyń Úkimeti arasyndaǵy ınvestıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» zań jobasy talqylandy. Atalǵan kelisim Astana qalasynda 2012 jyldyń 2 shildesinde jasalǵan.
Kelisim ekijaqty qarym-qatynasty damytýǵa, taraptardyń ınvestıtsııalyq klımatyn jaqsartýǵa, eki memleket arasyndaǵy ózara tıimdi ekonomıkalyq yntymaqtastyqty odan ári damytýǵa yqpal etetin bolady. Budan bólek, kelisim aıasynda eki elde ózara ınvestıtsııalardy qoldaý úshin qolaıly jaǵdaılar jasaý kózdelip otyr. Bul rette bir tarap ekinshi tarap ınvestorlaryna ózderiniń ulttyq ınvestorlaryna usynatyn rejımnen kem bolmaıtyn jaǵdaı belgileıtin bolady. Eki memleket ınvestorlarynyń ınvestıtsııalary men odan túsken kiristerine ádil jáne teń quqyly rejım usynylyp, olardyń tolyq qorǵalýyn qamtamasyz etedi.
Budan bólek, kelisim aıasynda eki memleket soǵystyń, basqa da qarýly qaqtyǵystardyń, búlinshiliktiń, kóterilisterdiń saldarynan óz aýmaǵynda zalal shekken kezde olarǵa restıtýttsııaǵa, óteýge nemese ótemaqyǵa qatysty óz ınvestorlaryna usynatyn qolaıly rejımnen kem bolmaıtyn tártipti ózara ustanady.
Zań jobasynda Qazaqstan men Makedonııa arasyndaǵy daýlardy sheshý rásimin jan-jaqty retteıtin erejeler de qamtylyp otyr. Qujat palatanyń jalpy otyrysyna shyǵarylatyn bolady.
