Qazaqstan men Lıýksembýrg Uly Gertsogtigi arasynda qosarlanǵan salyq salýdy boldyrmaý kózdeledi - Májilis
ASTANA. 25 qyrkúıek. QazAqparat - Búgin QR Parlamenti Májilisiniń jalpy otyrysynda palata depýtattary Qazaqstan men Lıýksembýrg Uly Gertsogtigi arasyndaǵy Tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaýǵa baǵyttalǵan qujatty maquldady.
Atalǵan zań jobasynyń resmı ataýy «Qazaqstan Respýblıkasynyń Úkimeti men Lıýksembýrg Uly Gertsogtiginiń Úkimeti arasyndaǵy Tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııany jáne 2008 jylǵy 26 maýsymda Astanada qol qoıylǵan QR Úkimeti men Lıýksembýrg Uly Gertsogtiginiń Úkimeti arasyndaǵy Tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııaǵa ózgerister men tolyqtyrýlar engizý týraly QR Úkimeti men Lıýksembýrg Uly Gertsogtiginiń Úkimeti arasyndaǵy hattamany ratıfıkatsııalaý týraly».
Qujattyń maqsaty eki el arasyndaǵy ınvestıtsııalar úshin qolaıly jaǵdaı jasaý arqyly ekonomıkalyq yntymaqtastyqty nyǵaıtý bolyp tabylady. Konventsııada ýaǵdalasýshy memleketterdiń biriniń rezıdentteri bolyp tabylatyn jeke jáne zańdy tulǵalardyń tabysy men kapıtalyna qosarlanǵan salyq salýdy joıý kózdeledi.
Budan bólek, qujatta tabystyń paıda bolý memleketinde tómendetilgen mólsherlemeler boıynsha dıvıdentterge, paıyzdarǵa jáne roıaltıge salyq salynýy múmkin erejeler kózdelgen.
Qarjy mınıstri Bolat Jámishevtiń aıtýynsha, konventsııanyń mańyzy zor. «Lıýksembýrg shaǵyn memleket bolǵanymen, onda iri halyqaralyq kompanııalardyń bas keńseleri ornalasqan. Osyndaı konventsııa arqyly sol elden ınvestıtsııalardyń kelýin yntalandyra alamyz», - dedi Bolat Jámishev.
Májilis maquldaǵan zań jobasy Parlament Senatyna joldanady.
