Qazaqstan men Lıýksembýrg Gertsogtigi qosarlanǵan salyqty boldyrmaıdy - Senat
ASTANA. 10 qazan. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń Úkimeti men Lıýksembýrg Uly Gertsogtiginiń Úkimeti arasyndaǵy
Tabys jáne kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııany jáne osy Konventsııaǵa ózgerister men tolyqtyrýlar engizý týraly hattamany ratıfıkatsııalaý týraly» QR Zańy qabyldandy.
Konventsııaǵa 2008 jylǵy 26 maýsymda Astanada qol qoıylǵan bolatyn. Qujattyń maqsaty ınvestıtsııaǵa qolaıly jaǵdaı qalyptastyrý arqyly Qazaqstan men Lıýksembýrg arasynda ekonomıkalyq yntymaqtastyqty nyǵaıtý jáne keńeıtý bolyp tabylady. Konventsııa qosarlanǵan salyq salýdy joıý maqsatynda jasalǵan ekijaqty halyqaralyq kelisim retinde sanalady. Ýaǵdalasýshy memleketterdiń árqaısysy salyq tóleýshige salyqty bir-aq ret - ýaǵdalasýshy memleketterdiń bireýinde ǵana tóleý múmkindigin qamtamasyz etedi. Ekinshi memleket salyqtyń tólengen somasyn esepke alatyn bolady nemese basqa memlekette salyq salynǵan bóligin jalpy kiristen alyp tastaıdy.
Konventsııada kiris týyndaǵan memlekette tómendetilgen mólsherleme boıynsha dıvıdendterge, paıyzdarǵa jáne roıaltıge salyq salynatyn erejeler qarastyrylǵan. Konventsııanyń 5-babyna sáıkes, ýaǵdalasýshy memlekettiń biriniń rezıdenti - zańdy tulǵa, egerde ýaǵdalasýshy memlekette turaqty mekeme qurmaı, kásipkerlik qyzmetti júzege asyratyn bolǵanda qosymsha qun salyǵynan bosatylýy múmkin. Al Konventsııaǵa ózgerister men tolyqtyrýlar engizý týraly hattamaǵa 2012 jylǵy 3 mamyrda Lıýksembýrgte qol qoıylǵan bolatyn.
Qujat ýaǵdalasýshy memleketterdiń biriniń rezıdentteri bolyp tabylatyn zańdy jáne jeke tulǵalardyń salyq salýdan jaltarýyna jol bermeý jáne qosarlanǵan salyq salýdy boldyrmaý maqsatynda salyq salý máseleleri boıynsha aqparat almasý arqyly eki memlekettiń salyq qyzmetteriniń yntymaqtastyǵyn keńeıtýdi kózdeıdi.
