Qazaqstan men Lıýksembýrg avıatsııa jáne logıstıka salasyndaǵy yntymaqtastyqty keńeıtpek
ASTANA. KAZINFORM — 2005 jyldan beri Lıýksembýrgten Qazaqstanǵa tartylǵan tikeleı ınvestıtsııalar 3,8 mlrd AQSh dollarynan asqan, dep habarlaıdy QR SІM baspasóz qyzmeti.
Lıýksembýrg Uly Gertsogtigine jumys sapary aıasynda Qazaqstan Respýblıkasynyń Belgııa jáne Lıýksembýrgtegi elshisi Roman Vasılenko tsıfrlyq tehnologııalar, avıatsııalyq logıstıka jáne ınnovatsııalar salalaryndaǵy jetekshi lıýksembýrgtik jáne halyqaralyq kompanııalardyń basshylarymen birqatar kezdesýler ótkizdi.
Kelissózderdiń negizgi taqyryptary birlesken joǵary tehnologııalyq jobalardy iske asyrý, kólik-logıstıkalyq ózara baılanystylyqty damytý jáne Qazaqstan men Lıýksembýrg arasyndaǵy ınvestıtsııalyq yntymaqtastyqty keńeıtý máseleleri boldy.
«SES» kompanııasynyń shtab-páterinde elshi R.Vasılenko kompanııanyń bas dırektory Adel Al-Salehpen kezdesti. Taraptar Eýropalyq odaqtyń «Team Europe Initiative on Digital Connectivity in Central Asia» jobasyn iske asyrý, Qazaqstandaǵy spýtnıktik baılanysty damytý, sondaı-aq ulttyq ǵarysh ınfraqurylymyn jańǵyrtý jobalaryna lıýksembýrgtik taraptyń qatysý perspektıvalaryn talqylady.
«Cargolux» kompanııasynda elshi kompanııa prezıdenti Rıchard Forsonmen jáne qarjy dırektory Maksım Shtraýspen kelissózder júrgizdi. Kezdesý barysynda áýekompanııasynyń Qazaqstandaǵy qyzmetin qaıta bastaý perspektıvalary, sondaı-aq Qazaqstandy óńirlik avıatsııalyq júk haby retinde damytý jónindegi bastamalardy iske asyrýǵa «Cargolux»-tyń qatysýy talqylandy.
Jahandyq tranzıttik baǵyttardyń ózgerýi jáne Qazaqstannyń Eýropa men Azııa arasyndaǵy negizgi kólik dálizderiniń biri retindegi róliniń artýyna erekshe nazar aýdaryldy. Osy turǵyda halyqaralyq logıstıkalyq tizbekterdiń transformatsııasy jaǵdaıynda Transkaspıı halyqaralyq kólik baǵytynyń mańyzdylyǵy atap ótildi. Sapar aıasynda sondaı-aq «Hydrosat» kompanııasynyń prezıdenti jáne teń quryltaıshysy Roıs Dalbımen kezdesý ótti.
Taraptar sý resýrstaryn spýtnıktik monıtorıngteý, tsıfrlyq aýyl sharýashylyǵy jáne klımattyq sheshimder salalaryndaǵy yntymaqtastyq perspektıvalaryn, sonyń ishinde «Qazaqstan Ǵarysh Sapary» UK» AQ-pen birlesken jobalardy talqylady. Kezdesýler barysynda 2005 jyldan beri Lıýksembýrgten Qazaqstanǵa tartylǵan tikeleı ınvestıtsııalardyń jıyntyq jalpy aǵyny 3,8 mlrd AQSh dollarynan asqany atap ótildi.
— Bul lıýksembýrgtik qarjy jáne tehnologııalyq qurylymdardyń qazaqstandyq naryqqa degen turaqty qyzyǵýshylyǵyn kórsetedi. Sapar qorytyndysy boıynsha taraptar Qazaqstan men Lıýksembýrg arasyndaǵy ınvestıtsııalyq, tehnologııalyq jáne kólik-logıstıkalyq yntymaqtastyqty odan ári keńeıtýge ózara múddeliligin rastady, — delingen habarlamada.
Budan buryn Qazaqstan men Brazılııa SІM basshylary Astanada kelissóz ótkizgenin jazdyq.
