Qazaqstan men Lıýksembýrg arasynda turaqty áýe reısteri ashylatyn boldy
Indýstrııa jáne ınnovatsııalyq damý mınıstrligi men Lıýksembýrgtiń bılik ókilderi eki el arasyndaǵy áýe qatynasy týraly memorandýmǵa qol qoıdy.
«Buǵan deıin tek charterlik reıster ǵana bolǵan. Endi turaqty áýe tasymaldary jolǵa qoıylady. Sonymen qatar, buryn Lıýksembýrgten oryndalatyn reıster aptasyna 7 ret bolsa, endi osy memorandým arqyly olardyń kólemi 21-ge deıin ulǵaıady. Bul – negizgi kelisim. Frantsııa men Fınlıandııadan keıin Lıýksembýrgpen «ashyq aspan» erejeleri aıasynda ashyqtyqtyń 5-deńgeıine qol jetkizip otyrǵan úshinshi el sanalady», - dedi Marat Kárimjanuly BAQ-qa arnalǵan brıfıngte.
Mınıstrdiń aıtýynsha, osy kelisim Qazaqstannyń avıatsııa salasy úshin jańa múmkindikter ashyp, elimizdiń Eýropa men Ońtústik-shyǵys Azııa arasyndaǵy keńistiktegi negizgi tranzıttik hab retindegi rólin nyǵaıtady.
«Jańa tranzıttik reısterdi tartý qazaqstandyq avıatorlardyń kásibı quzyretterin arttyrýǵa septigin tıgizedi. Bul kásipkerler úshin de jańa múmkindikter beredi. Aıtalyq, Qazaqstannyń naryǵy suranysqa ıe taýarlarmen qamtylady. Sondaı-aq, Astana arqyly Eýropa men Ońtústik-Shyǵys Azııa elderine qajetti ónimder jetkiziledi», - dedi M. Qarabaev.
Atalǵan kompanııanyń Astanaǵa alǵashqy reısi 1 mamyrda jasalǵan. Qazir Cargolux elordalyq áýejaı arqyly Lıýksembýrgti Qytaı jáne Japonııamen baılanystyryp, aptasyna 7 reısti oryndap keledi. Úkimetaralyq kelisim sheńberinde aldaǵy ýaqytta ekijaqty turaqty júk reısterin aptasyna 42-ge deıin ulǵaıtý kózdelgen.
«Biz osy memorandýmdy jasasýdy qup kórdik. Óıtkeni, Qazaqstannyń astanasyndaǵy áýejaı arqyly ótetin júk reısteriniń jıiligin arttyramyz. Bolashaqta bul Eýropa men Azııany baılanystyryp, Astana áýejaıy arqyly jetkiziletin júk tasymaly kóleminiń artýyna áser etedi úmittenemiz», - dedi Cargolux avıakompanııasynyń prezıdenti Rıchard Forson.
