Qazaqstan men Lıtva júk tasymalyn tsıfrlandyrýǵa kiristi
ASTANA. KAZINFORM - 2026 jylǵy 20 mamyrda Qazaqstan Respýblıkasy Kólik mınıstrliginiń Avtomobıl kóligi jáne kóliktik baqylaý komıteti tóraǵasy men Lıtva Respýblıkasynyń Qazaqstandaǵy Tótenshe jáne Ókiletti Elshisiniń kezdesýi ótti.
QR Kólik mınıstrligi baspasóz qyzmetiniń habarlaýynsha, kezdesý barysynda taraptar kólik salasyndaǵy ekijaqty yntymaqtastyqtyń ózekti máselelerin, sonyń ishinde halyqaralyq avtomobıl tasymaldaryn júzege asyrý úshin ruqsat qaǵazdarynyń úlgilerin qoldaný jáne olardyń elektrondyq formatqa kóshý perspektıvalaryn talqylady.
Lıtva tarapy elektrondyq formatqa kóshýge qyzyǵýshylyq tanytty. Aldaǵy ýaqytta osy baǵytta birlesken jumys uıymdastyrý josparlanyp otyr.
-Taraptar halyqaralyq tasymaldar salasyndaǵy ózara árekettestikti odan ári damytý jáne tasymaldaýshylar úshin protsesterdi jeńildetýge baǵyttalǵan zamanaýı tsıfrlyq sheshimderdi engizýdiń mańyzdylyǵyn atap ótti, -delingen habarlamada.
Osyǵan deıin Májilis depýtatynyń Qazaqstanǵa kólik-logıstıkalyq habtardyń biryńǵaı modelin engizýdi usynǵany týraly jazdyq.
