Qazaqstan men Lıtva zańsyz kóshi-qonǵa qarsy birlesken is-qımyl jasaıtyn bolady - Senat

ASTANA. QazAqparat - Búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Qazaqstan Respýblıkasynyń Úkimeti men Latvııa Respýblıkasynyń Úkimeti arasyndaǵy adamdardyń readmıssııasy týraly kelisimdi ratıfıkatsııalaý týraly» zań jobasy qarady. Talqylaýdan soń depýtattar zań jobasyn palatanyń aldaǵy ýaqytta ótetin jalpy otyrysyna shyǵarý týraly sheshim qabyldady.

Kelisimge 2011 jyldyń 16 qyrkúıeginde Rıgada qol qoıylǵan. Kelisimniń maqsaty Qazaqstan men Latvııa arasyndaǵy eki memlekettiń biriniń aýmaǵyna zańsyz kelýdi júzege asyrǵan nemese zańsyz júrgen adamdardy keri qabyldaýdy ońaılatý bolyp tabylady. Qabyldaıtyn memleket bergen jaramdy ulttyq pasporty, jaramdy vızasy nemese bolýǵa ruqsaty bar adamdarǵa qatysty readmıssııa týraly suraý salýdy talap etilmeıdi. Biraq bul rette taraptardyń quzyretti organdary mundaı adamnyń shyǵýyna deıin jetpis eki saǵattan keshiktirmeı shyǵý kúni týraly bir-birin habardar etetin bolady. Eki el readmıssııa týraly suraý salýǵa jaýapty alǵan kúnnen bastap on tórt jumys kúninen keshiktirmeı berýi tıis. Al ondaı jaýap alynǵannan keıin adamdardy berý kúntizbelik otyz kúnnen keshiktirilmeı júzege asyrylatyn bolady. Tutastaı alǵanda, atalǵan qujat eki memlekettiń aýmaǵyna kirý jáne onda bolý týraly shartty buzǵan adamdardy anyqtaýdy jáne qaıtarýdy kózdeıdi. Kelisimdi ratıfıkatsııalaý halyqaralyq quqyqtar sheńberinde zańsyz kóshi-qonǵa qarsy is-qımyl jasaýǵa múmkindik beredi. Talqylaýdan soń komıtet zań jobasyn palatanyń jalpy otyrysyna shyǵarý týraly sheshim qabyldady.