Qazaqstan men Lıtva sottalǵandardy berý tártibin aıqyndady
NUR-SULTAN. QazAqparat - Búgin QR Parlamenti Senatynyń jalpy otyrysynda «Qazaqstan Respýblıkasy men Lıtva Respýblıkasy arasyndaǵy bas bostandyǵynan aıyrýǵa sottalǵan adamdardy jáne medıtsınalyq sıpattaǵy májbúrleý sharalary qoldanylǵan adamdardy berý týraly shartty ratıfıkatsııalaý týraly» Zańy qabyldandy, dep habarlaıdy QazAqparat tilshisi.
Shartqa 2017 jyly sáýirde Vılnıýste qol qoıyldy. Qujatqa sáıkes Qazaqstan azamaty Lıtvada bas bostandyǵynan aıyrylsa nemese májbúrlep emdeýge jiberilse, onyń jazasyn ótetý úshin elimizge qaıtara alamyz. Lıtva azamattaryn da óz eline berýge bolady.
«Shartta birqatar talaptar bar. Aldymen, ol bizdiń eldiń nemese Lıtvanyń azamaty bolýy tıis. Sottalǵan adamnyń nemese onyń zańdy ókiliniń kelisimi kerek. Eki elde de onyń jasaǵan áreketi qylmys bolyp tabylýy tıis. Berýge eki jaqtyń da kelisimi bolýy kerek», - dep atap kórsetti M.Axmetjanov.
Atap aıtqanda, qujat boıynsha berýge jatpaıtyn adamdar da bar. Eger ulttyq zańnama boıynsha jazany oryndaý múmkin bolmasa, sondaı-aq sottalǵandy eline qaıtarý egemendik pen qoǵamdyq tártipke nuqsan keltirse jáne ulttyq zańnama men memlekettiń múddesine qaıshy bolsa, ondaı azamattar berilmeıdi.
Munymen qosa, sottalǵan adam keltirgen zalaldy ótemese, sol jerde qala beredi.
