Qazaqstan men Qytaıǵa birqatar mańyzdy jobalardy júzege asyrý kerek - Qazaqstan Prezıdenti
ASTANA. QazAqparat - Memleket basshysy Nursultan Nazarbaev Qytaı Halyq Respýblıkasy Memlekettik keńesiniń Premeri Lı Ketsıanmen kezdesti, dep habarlaıdy Aqordanyń baspasóz qyzmeti.
Kezdesýde taraptar Qazaqstan men Qytaı Halyq Respýblıkasy arasyndaǵy ekijaqty yntymaqtastyqtyń ahýaly jáne ony damytý perspektıvalary jóninde pikir almasty.
- Bizdiń qarym-qatynasymyz basqa memleketter úshin úlgi bolarlyqtaı. 2014 jylǵy kezdesýde biz óndiris ashý, kólik júıelerin bir-birimen jalǵastyrý jónindegi jobalardy iske asyrý máselesin kóterdik. Sondaı-aq, taǵy birqatar mańyzdy jobalardy júzege asyrýymyz kerek, - dedi Qazaqstan Prezıdenti.
Nursultan Nazarbaev ıntegratsııalyq protsesterdiń mańyzdylyǵyna toqtalyp, «Bir beldeý, bir jol» bastamasynyń qazirgi jaǵdaıdaǵy erekshe rólin atap ótti.
Memleket basshysy «Nurly jol» men Jibek joly baǵdarlamalaryn bir-birimen ushtastyrýdyń oń nátıjelerine nazar aýdardy.
Sonymen qatar, taraptar memleketter arasynda taýar aınalymy kólemin ulǵaıtý máselelerin, Qazaqstannyń tranzıttik áleýetin paıdalaný perspektıvalaryn, tehnologııalardy jáne ekologııalyq turǵydan taza zamanaýı óndiristi damytý aspektilerin, sondaı-aq energetıka men aýyl sharýashylyǵy salalarynda ózara is-qımyl ornatý jaıyn talqylady.
Qazaqstan Prezıdenti kezdesý sońynda Lı Ketsıandi elimizge saparmen kelýge shaqyrdy.
