Qazaqstan men Qytaıdyń joǵary sot organdary memorandýmǵa qol qoıdy
Sapar barysynda Q.Mámı Qytaıdyń Joǵarǵy Halyq Sotynyń Tóraǵasy Tsıan Chjoý myrzamen kezdesti. Taraptar barlyq salalar, sonyń ishinde, quqyqtyq máseleler boıynsha Qazaqstan-Qytaı arasynda qarym-qatynasynyń joǵary deńgeıi qalyptasqanyn atap ótti. Qazaqstan Joǵarǵy Sotynyń Tóraǵasy forýmǵa shaqyrǵany úshin alǵys bildire kele, atalǵan is-sharanyń memleketaralyq yntymaqtastyqty quqyqtyq qoldaýdaǵy mańyzdylyǵyn atap ótti.
Q.Mámı qytaılyq áriptesin Ult Jospary sheńberinde sot júıesinde júrgizilgen reformalardyń negizgi qorytyndylary, Qazaqstandaǵy elektrondy sot tóreliginiń damýy jáne qylmystyq-protsestik quqyqty jaqsartý boıynsha júrgizilip jatqan jumys barysy týraly habardar etti. Sýdıalardy oqytý máseleleri boıynsha birlesken jumystyń joǵary deńgeıi aıryqsha atalyp ótildi. Áńgime barysynda taraptar barlyq talqylanǵan máseleler boıynsha qyzý pikir almasty.
Kezdesý sheńberinde eki eldiń joǵary sot organdary arasynda Yntymaqtastyq týraly memorandýmǵa qol qoıyldy. Qujatta sot ákimshiligi, elektrondy sot tóreligi jáne bilim berý baǵdarlamalary sekildi basym baǵyttarǵa erekshe kóńil bólingen. Eki eldiń sot bilimin berý mekemeleri arasyndaǵy ózara is-qımyldy keńeıtýge aıryqsha mán berildi.
Memorandýmda halyqaralyq baǵdarlamalar men baılanystar sheńberinde quqyqtyq aqparatpen jáne sot praktıkasymen almasý, tıisti konsýltatsııalar ótkizý, ózara qoldaý kórsetý jáne ortaq ustanymdardy qalyptastyrý kózdelip otyr. Eki el arasyndaǵy quqyqtyq kómekti nyǵaıtý, sonyń ishinde, sot sheshimderin moıyndaý men atqarý máselelerin sheshý, dáleldemelerdi jınaý jáne basqa da protsestik áreketterdi júrgizý týraly tapsyrmalardy oryndaý máseleleri aıtylǵan.
Qol qoıý rásiminde sóılegen sózinde Q.Mámı Memorandým sot tóreligin jetildirý men quqyq ústemdigimen baılanysty ózge de máseleler boıynsha birlesken bastamalardy iske asyrýdaǵy eki el sot organdarynyń tıimdi ózara is-qımylyna yqpal etetindigin atap ótti.
