Qazaqstan men Qytaıdyń ekijaqty ekonomıkalyq máseleleri talqylandy

NUR-SULTAN. QazAqparat - Qazaqstan Respýblıkasynyń Premer-Mınıstri Asqar Mamın Qytaıdyń Kommýnıstik partııasynyń Ortalyq komıtetiniń Saıası bıýrosynyń Turaqty komıtetiniń múshesi, Qytaı Halyq Respýblıkasynyń Memlekettik keńesiniń Premeriniń Orynbasary Han Chjenmen kelissózder júrgizdi, dep habarlaıdy QazAqparat primeminister.kz-ge silteme jasap.

Kezdesýde ekijaqty ekonomıkalyq qarys-qatynastardy damytýdyń, shekara mańy yntymaqtastyǵyn, onyń ishinde «Qorǵas» halyqaralyq shekara mańy yntymaqtastyǵy ortalyǵyn damytý arqyly da tereńdetýdiń ózekti máseleleri talqylandy.

«Nurly Jol» ekonomıkalyq saıasatyn jáne «Beldeý jáne jol» strategııasyn qosarlaý aıasyndaǵy ındýstrııalyq-ınnovatsııalyq yntymaqtastyqqa erekshe kóńil bólindi. Barlyǵy jalpy somasy $27 mlrd-qa 55 qazaqstandyq-qytaılyq joba iske asyrylatyn bolady. 2015 jyldan 2018 jyl aralyǵynda $3,8 mlrd somasyna 12 joba paıdalanýǵa berildi, bıyl $310 mln-ǵa 5 jobany iske qosý josparlanǵan. Olardyń ishinde kún elektr stantsııalarynyń, GES, zamanaýı et kombınaty kesheniniń qurylysy bar. $5,5 mlrd somasyna 11 joba júzege asyrylý ústinde. $18,1 mlrd teńge somasyna qalǵan jobalar boıynsha daıyndyq jumystary júrgizilip jatyr. Jalpy, jobalardy iske asyrý 20 myńǵa jýyq jańa jumys ornyn qurýǵa múmkindik beredi.

Saýda-ekonomıkalyq yntymaqtastyqty odan ári ilgerletý úshin taraptar búgin Almaty qalasynda eki eldiń memlekettik organdary men bıznes qurylymdarynyń 400-den astam ókilderiniń, onyń ishinde Sychýan jáne Shensı qytaı provıntsııalarynyń, Gýansı-Chjýan, Shyńjań-Uıǵyr avtonomdy aýdandarynyń basshylarynyń qatysýymen ótip jatqan ІІ QR - QHR aımaqaralyq yntymaqtastyq forýmynyń mańyzdylyǵyn atap ótti. Sonymen qatar, A. Mamın qytaı delegatsııasynyń aldaǵy XII Astana ekonomıkalyq forýmyna qatysýy ekijaqty yntymaqtastyqty damytýǵa zor qarqyn beretinin aıtty.

Kelissózder barysynda QR Úkimetiniń basshysy kólik-logıstıkalyq kompetentsııalar men tranzıttik dálizderdi, energetıkany, ónerkásipti, agroónerkásip keshenin damytýdaǵy ózara is-qımyldy kúsheıtýdiń, ásirese, qazaqstandyq aýyl sharýashylyǵy ónimderiniń eksportyn ulǵaıtýdyń qajettigin atap ótti.

«Qytaı - Qazaqstannyń iri syrtqy saýda seriktesi. 2018 jyly QR men QHR arasyndaǵy taýar aınalymy 11,1%-ǵa ulǵaıyp, $11,7 mlrd kórsetkishine jetti. Bıylǵy eki aıdyń qorytyndysy boıynsha saýda-sattyq kólemi $2 mlrd qurady, bul 2018 jyldyń sáıkes kezeńindegi kórsetkishten 12,1%-ǵa joǵary. - Biz osyndaı oń qarqynnyń saqtalýyna múddelimiz», - dedi A. Mamın.