Qazaqstan men Qytaıdyń birlesken zaýyttary qorshaǵan ortany lastamaıdy – Jeńis Qasymbek

NUR-SULTAN. QazAqparat – QR Premer-Mınıstriniń orynbasary Jeńis Qasymbek Qazaqstan men Qytaıdyń birlesken jobalary týraly pikir bildirdi, dep habarlaıdy QazAqparat tilshisi.

Vıtse-premer Indýstrıalızatsııa baǵdarlamasy aıasynda Qazaqstan men Qytaıdyń 55 birlesken jobasy josparlanǵanyn eske saldy. Onyń 15-i júzege asyrylǵan jáne taǵy beseýi jyl sońyna deıin ashylady.

«Jańa zaýyttar men jobalar las, ekologııalyq turǵyda zııan degen qaýesetter júr. Ekinshiden, Qytaıdyń eski zaýyttary Qazaqstanǵa aýystyrylady degen pikirler bar. Resmı túrde eshqandaı eski zaýyttyń joqtyǵyn málimdeımin. Barlyq jobalarda jańa tehnologııalar qoldanylady. Ár jobasy týraly sanamalap aıtyp berýge ázirmin», - dedi Jeńis Qasymbek Úkimet úıinde ótken baspasóz máslıhatynda.

Mysal retinde J. Qasymbek Qapshaǵaıda ashylǵan balamaly energııa stantsııasyn atap ótti.

«Kásiporyn jańa, onda jumys isteıtin 30 adamnyń barlyǵy – Qazaqstan azamattary. Bul – balamaly energııa, oǵan birtindep aýysatyn bolamyz. Jyl sońyna deıin Qazaqstanda jel men kúnnen myńdaǵan megavatt óndiriledi. Mundaı álemdik úrdisten tys qala almaımyz», - dedi ol.

Vıtse-premer salynyp jatqan kásiporyndardyń joǵary tehnologııaly ekenin, qorshaǵan ortany lastamaıtynyn jetkizdi. Barlyq jobalar týraly aqparat QR Indýstrııa jáne ınfraqurylymdyq damý saıtynda jarııalanǵan.

Buǵan deıin Premer-Mınıstr orynbasary Qazaqstanǵa ınvestıtsııa salǵan memleketter týraly baıandaǵan edi.

Onyń aıtýynsha, qytaılyq ınvestorlar qarjylandyratyn kásiporyndardaǵy jumysshylardyń 95% qazaqstandyqtar.