Qazaqstan men Qytaı júk tasymalynda elektrondy qujat aınalymyna kóshedi
Úkimet basshysynyń aıtýynsha, qazirgi ýaqytta Eýrazııalyq ekonomıkalyq odaq (EAEO) pen oǵan múshe memleketterdiń Qytaı Halyq Respýblıkasymen (QHR) arasyndaǵy «Kólik dálizderi men baǵyttaryn qalyptastyrý, damytý jáne tsıfrlandyrý» baǵyty boıynsha saýda-ekonomıkalyq yntymaqtastyqty damytý jónindegi jospardyń jobasy eskerilgen. Osy oraıda júrgizilip jatqan jumys aıasynda tasymaldaý jáne taýarǵa ilespe qujattar bóliginde tıisti qadamdar qarastyryldy.
«2022 jylǵy qańtarǵa deıingi halyqaralyq tasymaldardy resimdeý kezinde zańdyq mańyzy bar elektrondy qujat aınalymyna kóshý jónindegi is-sharalar kózdelgen», - dep jaýap berdi A. Mamın.
Osy oraıda ol «QTJ» UK» AQ men Qytaı temir joly arasynda halyqaralyq júk qatynasy týraly elektrondy derektermen almasý boıynsha kelisim jasalǵanyn jáne bıylǵy qarasha aıynda TsIM júkqujatynyń tehnıkalyq ereksheligimen ári taýarǵa ilespe qujattarmen (Halyqaralyq júk tasymaly týraly shartqa temirjolmen tasymaldyń biryńǵaı erejesi (Invoıs, Qaptaý paraǵy) tolyqtyrý bóliginde qosymsha kelisimniń jobasy jiberilgenin eske saldy.
«Alaıda Qytaı temir joly tarapynan «Senim bildirgen úshinshi tarap» júıesi boıynsha elektrondy tsıfrlyq qoltańbany (ETsQ) paıdalanýdyń zańdylyǵy máselesi sheshilmegen. Osyǵan baılanysty «QTJ» UK» AQ jaýapty memlekettik organdarmen birlesip, temirjol tasymaldaryn qaǵazsyz tehnologııa boıynsha resimdeýge kóshýdi jedeldetý jáne Qazaqstan Respýblıkasy qabyldaǵan halyqaralyq mindettemelerdi oryndamaý táýekelderin joıý úshin osy máseleni sheshýge járdemdesý týraly jumys júrgizýde», - dep jazdy Úkimet basshysy.
Eske sala keteıik, senator Nurlan Qylyshbaev elimizdiń Premer-Mınıstri Asqar Mamınniń atyna joldaǵan depýtattyq saýalynda kásipkerlerdiń Qytaımen shekara arqyly taýar tasymaldaý kezinde kezdesetin máselelerin kótergen edi.
