Qazaqstan men Qytaı Súmbe ózenin birlesip paıdalanýǵa kelisti

NUR-SULTAN. QazAqparat - QR Úkimeti men Qytaı Halyq Respýblıkasynyń Úkimeti arasynda Súmbe transshekaralyq ózeni týraly kelisimge qol qoıyldy. Bul QHR Tóraǵasy Sı Tszınpınniń Qazaqstanǵa memlekettik sapary aıasynda ótkizildi, dep habarlaıdy QazAqparat Ekologııa mınıstrligine silteme jasap.

Qazaqstan Respýblıkasy Úkimetiniń atynan kelisimge QR Ekologııa, geologııa jáne tabıǵı resýrstar vıtse-mınıstri Álııa Shalabekova, Qytaı Halyq Respýblıkasy Úkimetiniń atynan Sý sharýashylyǵy mınıstriniń orynbasary Tıan Sıýebın qol qoıdy.

«Sý qatynastary bizdiń elderimiz arasyndaǵy yntymaqtastyqtyń mańyzdy baǵyttarynyń biri bolyp tabylady. Oǵan joǵary deńgeıdegi barlyq ekijaqty kezdesýlerde sý máselelerin únemi talqylaý dálel bolady», - dedi vıtse-mınıstr óziniń kirispe sózinde.

Aıta ketý kerek, atalǵan qujatqa qol qoıý Súmbe ózeniniń sý resýrstaryn utymdy paıdalanýǵa jáne Almaty oblysy Raıymbek aýdanyndaǵy aýyl sharýashylyǵy muqtajdyqtaryna sý jınaýdy jaqsartýǵa múmkindik beredi.

Qazaqstan tarapyna arnaǵan sózinde Sý sharýashylyǵy mınıstriniń orynbasary Tıan Sıýebın kelisimge qol qoıý transshekaralyq ózenderdiń resýrstaryn utymdy jáne ádil paıdalaný konteksinde eki el arasyndaǵy ózara yntymaqtastyqty damytýǵa qýatty serpin beretinin atap ótti.

Foto: t.me/EcologyofQazaqstan