Qazaqstan men Qytaı shekarasyndaǵy kólik keptelisin sheshý úshin birqatar sharalar qabyldandy

ALMATY OBLYSY. QazAqparat - Pandemııa bastalǵannan beri qytaı tarapy shekarada sanıtarııalyq baqylaýdyń kúsheıtilgen sharalaryn engizdi jáne kólikti kún saıyn ótkizý 20 birlikke deıin qysqardy. Bul «Nur joly» ótkizý pýnkti aýmaǵynda Qazaqstannan Qytaıǵa baratyn 1700-ge deıin avtokólik kezeginiń paıda bolýyna alyp keldi, dep habarlaıdy QazAqparat QM Memlekettik kirister komıtetinińbaspasóz qyzmetine silteme jasap.

Toptalý máselesin sheshý úshin birqatar sharalar qabyldandy, sonyń ishinde qytaı tarapymen kelissózder júrgizildi, olardyń nátıjeleri boıynsha qabyldanatyn kólik sany kúnine 20 bastap 100-ge deıin ulǵaıdy.

2020 jylǵy 1 shildeden bastap buryn ýaqytsha jabylǵan «Qaljat», «Baqty», «Maıqapshaǵaı» ótkizý pýnktteri ashyldy. Alaıda, qytaı tarapynan ótkizý pýnktterin jabý sebebi boıynsha taýarlar men kólikti ótkizý júzege asyrylmaıdy.

Úkimet deńgeıinde qytaılyq tasymaldaýshylardyń kirýin jáne shekaralyq kóliktik-logıstıkalyq ortalyqtarǵa taýarlardy aýystyryp tıeý múmkindigin kózdeıtin QHR-men ótkizý pýnktteriniń ótkizý qabiletin arttyrý jónindegi is-sharalar jospary qabyldandy. Qytaı júrgizýshileri endi ótkizý pýnktiniń aýmaǵyna 24 saǵatqa vızasyz rejımde kire alady.

Qytaıǵa eksportqa ónimderdi ótkizetin otandyq eksporttaýshylar úshin bir mezgilde «jasyl dáliz» quryldy. Olardy ótkizý kezekten tys júzege asyrylady.

Osylaısha, shekarada kóliktiń toptalýyn azaıtýǵa baǵyttalǵan sharalar qabyldandy. Úkimettik deńgeıde Qytaımen taýar aınalymyn ulǵaıtý jónindegi usynystarmen Qytaıdyń Memlekettik Keńesine ótinish joldandy.

Qytaı tarapy taýarlardy ótkizýdiń jańa tártibin keliskennen keıin shekara arqyly ótkiziletin kólik sanynyń kúnine 200-ge deıin artýy jáne tıisinshe toptalýdyń tómendeýi kútilýde.

Alaıda, aǵymdaǵy jylǵy 20 shildeden bastap Shyńjań-Uıǵyr avtonomııalyq aýdanynda koronavırýstyq ınfektsııanyń órshýine baılanysty Qytaı Qazaqstan tapapynan kólik qabyldaýdy kúnine 10-ǵa deıin qysqartty.

Shekara arqyly birinshi kezekte tasymaldaýǵa arnalǵan kelisimsharttarǵa baılanysty Qytaıǵa taýar úshin jiberiletin eksporttyq taýarlar men tasymaldaýshylar ótkiziletin bolady.

Qazaqstan-Qytaı shekarasyndaǵy temirjol ótkizý pýnktteri shtattyq rejımde jumys isteıtinin jáne aǵymdaǵy jylǵy birinshi jartyjyldyq qorytyndysy boıynsha taýarlardy ákelý kóleminiń 18%-ǵa artqanyn atap ótken jón.

Osyǵan baılanysty, QR Qarjy mınıstrliginiń Memlekettik kirister komıteti eksporttyq-ımporttyq operatsııalardy júrgizý kezinde syrtqy ekonomıkalyq qyzmetke qatysýshylardy logıstıkamen baılanysty yqtımal táýekelderdi eskerýge jáne kontragenttermen taýarlardy ótkizý jáne kelisimsharttar jasasý máselelerin aldyn ala pysyqtaýǵa shaqyrady.