Qazaqstan men Qytaı shekarasynda kontrabandalyq zergerlik buıymdardy ótkizbekshi bolǵan qazaqstandyq azamatsha ustaldy
ASTANA. QazAqparat - Qazaqstandyq shekarashylar qazaqstandyq-qytaılyq shekarada kontrabandalyq zergerlik buıymdardyń ótkizý áreketiniń jolyn kesti. Bul týraly QR UQK ShQ-niń baspasóz qyzmetinen habarlaıdy.
Maqanshy shekara jasaǵynyń «Baqty» ótkizý beketindegi shekarashylar zergerlik buıymdardy ótkizbekshi bolǵan Qazaqstannyń 33 jastaǵy azamatshasyn ustady. Qol júgin tekserý kezinde jalpy salmaǵy 400-ge jýyq gramdy quraǵan 925-shi jáne 585-shi synamaly moıyn alqalary, saqınalar, syrǵalar anyqtalyp, tárkilendi.
Áıeldiń anyqtalǵan júkti tasymaldaýǵa ruqsat beretin qujattary bolmady. Ol óz áreketterin buıymdardy jeke paıdalaný, syılyqqa tartý úshin ótkizgenimen túsindirip otyr.
Osy is boıynsha materıaldar Úrjar aýdandyq prokýratýrasyna jiberildi. Tergeý amaldary júrgizilip jatyr.
