Qazaqstan men Qytaı shekaradaǵy ótkizý pýnktteriniń jumysyna qatysty kelissóz júrgizdi
«Qazaqstandyq delegatsııany QR Qarjy mınıstrligi Memlekettik kirister komıtetiniń tóraǵasy M.Sultanǵazıev, qytaılyq tarapty QHR Shyńjań-Uıǵyr avtonomııalyq aýdany halyq úkimeti tóraǵasynyń birinshi orynbasary Chjan Chýnlın basqardy. Іs-sharaǵa QR Syrtqy ister, Densaýlyq saqtaý, Indýstrııa jáne ınfraqurylymdy damytý, Saýda jáne ıntegratsııa, Aýyl sharýashylyǵy mınıstrlikteriniń, QR Ulttyq qaýipsizdik komıteti Shekara qyzmetiniń, «UQ QTJ» AQ ókilderi, sondaı-aq QHR Shyńjań-Uıǵyr avtonomııalyq aýdanynyń múddeli memlekettik organdarynyń basshylary qatysty», - delingen taratylǵan aqparatta.
Vedomstvo málimetinshe, kelissóz barysynda taraptar kólik-kommýnıkatsııalyq ózara baılanysty jáne aımaqaralyq baılanystardy nyǵaıtýǵa kelisti. Saýda-ekonomıkalyq yntymaqtastyqtyń sapasyn arttyrýǵa járdemdesýge baǵyttalǵan buryn joǵary deńgeıde qol jetkizilgen ýaǵdalastyqtardy ustanatyndyqtaryn rastady.
Kelissóz nátıjesinde taraptar Qazaqstan-Qytaı memlekettik shekarasynyń avtomobıl jáne temirjol ótkizý pýnktterinde ótkizý qabiletin arttyrý, avtokólik quraldary men júkterge qatysty epıdemııaǵa qarsy is-sharalar júrgizý boıynsha birlesken sharalar qabyldaý týraly ýaǵdalasty.
«Qytaı tarapy qytaılyq taraptaǵy ótkizý pýnktteriniń jumysyn qalpyna keltirý úshin ótkizý pýnktteriniń epıdemııaǵa qarsy qaýipsizdigin qamtamasyz etý úshin qosymsha qurylys jumystary júrgizilýi kerek ekenin atap ótti. Ýaqytsha jabylǵan «Maıqapshaǵaı» - «Zımýnaı», «Qaljat» - «Dýlaty» ótkizý pýnktteriniń qyzmetin qalpyna keltirý merzimi 2021 jyldyń birinshi jartysynda anyqtaldy. Qol jetkizilgen ýaǵdalastyqtardyń oryndalýynyń aralyq nátıjelerin shyǵarý úshin kelesi otyrysty 2021 jylǵy 8 aqpanda ótkizý josparlanǵan», - dedi komıtetten.
