Qazaqstan men Qytaı prezıdentteri jańa konteınerlik baǵytty ashty
ASTANA. QazAqparat - Búgin Qazaqstan Prezıdenti Nursultan Nazarbaev pen Qytaı Halyq Respýblıkasynyń tóraǵasy Sı Tszınpın Lıanıýngan teńiz porty jáne «Qorǵas - Shyǵys qaqpasy» arnaıy ekonomıkalyq aımaǵy arasyndaǵy konteınerlik qyzmetti iske qosty. Atalǵan joba Qazaqstannyń «Nurly jol» baǵdarlamasy men Qytaıdyń «Jibek jolynyń ekonomıkalyq beldeýi» bastamasyn úndestirýdiń taǵy bir aıqyn kórinisi bolsa kerek, dep habarlaıdy QazAqparat tilshisi.
«Búgin eki óte mańyzdy joba iske asyp otyr. Lıanıýngan portynan alǵash ret Ortalyq Azııa arqyly Túrkııaǵa, al «Qorǵas - Shyǵys qaqpasy» arnaıy ekonomıkalyq aımaǵynan Qytaıdyń Chendý qalasyna konteınerlik baǵyttar ashylyp otyr. Atalǵan jobalar Qazaqstannyń «Nurly jol» baǵdarlamasy men Qytaıdyń «Jibek jolynyń ekonomıkalyq beldeýi» bastamasyn úndestirýdiń aıqyn dáleli bola alady. Bizdiń josparymyzǵa sáıkes, 2020 jylǵa deıin konteınerlik tasymaldyń kólemi 2 mln-ǵa jetýi tıis. Osynyń arqasynda eki eldiń ekonomıkalyq damýy arta túsedi», - dep atap kórsetti Nursultan Nazarbaev.
Óz kezeginde QHR Tóraǵasy Sı Tszınpın atalǵan joba kóliktik-logıstıkalyq yntymaqtastyq úshin jańa múmkindikter ashyp otyrǵanyn qadap aıtty.
«Qazaqstan teńizge shyǵý múmkindigin alyp otyr, osy oraıda Eýrazııalyq keńistikte logıstıkalyq ortalyqqa aınalýda. Bul turǵyda elderińiz Shyǵys pen Batys arasyndaǵy saýda tizbeginde mańyzdy rólge ıe boldy. Osy jetistikpen barlyq qazaqstandyq dostarymdy shyn júregimnen quttyqtaımyn. Qytaı men Qazaqstan arasyndaǵy transshekaralyq tasymal yntymaqtastyǵyn tereńdetý barsha óńirdi damytýda qýatty yntalandyrýshy kúsh bolyp otyr. Bul baǵyttaǵy ózara is-qımyldardy jalǵastyrýǵa múddelimiz»,-dedi Sı Tszınpın.
Osydan keıin Qazaqstan men Qytaıdyń prezıdentteri telekópir arqyly eki jaqtan konteınerlik poezdardy jiberýge ruqsat berdi. Búginnen bastap, Lıanıýngan portynan shyǵatyn konteınerlik poıyzdar Qazaqstan arqyly Ortalyq Azııa elderi men Túrkııanyń Stambýl qalasyna qatynaıdy. Tılbýrg (Germanııa) - Chendý (QHR) men Tashkent - Chendý arasyndaǵy júkter de Altynkól stantsııasymen ótedi. Jańa tranzıttik baǵyt arqyly «COSCO Shipping» kompanııasy buǵan deıin teńizben tasymaldap júrgen konteınerlerin Ortalyq Azııaǵa qurlyqpen jetkizetin bolady.
Aıta ketken jón, 21 mamyrda Beıjiń qalasynda ótken «Bir beldeý - bir jol» forýmy aıasynda Lıanıýngan porty, COSCO Shipping pen «Qazaqstan temir joly» ulttyq kompanııasy «Qorǵas - Shyǵys qaqpasy» arnaıy ekonomıkalyq aımaǵyn birlesip damytý týraly memorandýmǵa qol qoıǵan bolatyn.
