Qazaqstan men Qytaı ortaq sý torabyn salatyn bolady - Parlament
ASTANA. QazAqparat - Búgin Parlament Senatynyń jalpy otyrysynda «Qazaqstan men Qytaı arasyndaǵy Qorǵas ózeninde «Dostyq» birlesken ortaq sý torabyn salýdaǵy yntymaqtastyq týraly kelisimdi ratıfıkatsııalaý týraly» QR Zańy qabyldandy.
Atalǵan kelisim 2010 jylǵy 13 qarashada jasalǵan. Kelisimniń sharttaryna sáıkes, taraptar Qorǵas shekara pýnktinen 24,5 shaqyrym qashyqtaǵy Qorǵas ózeninde «Dostyq» birlesken ortaq sý torabyn salýdy júzege asyrady. Birlesken sý toraby ony teń úlespen ıelenetin taraptar memleketteriniń menshigi bolyp tabylady. Qurylysty qarjylandyrýdy taraptar birlesken sý toraby jalpy qunynyń 50 paıyzynan bólisip, yntymaqtastyqta júzege asyrady.
Birlesken sý torabyn basqarý jáne paıdalaný máseleleri taraptar arasynda jasalatyn jeke halyqaralyq shartpen retteletini kózdelgen.
