Qazaqstan men Qytaı memlekettik qyzmet salasynda tájirıbe almasýǵa ýaǵdalasty
ASTANA. QazAqparat - Qytaıdyń Tsıýanchjoý qalasynda BRIKS aýqymynda memlekettik basqarý boıynsha «Taǵdyry ortaq ǵalamdyq qaýymdastyqty qurý: ashyqtyq pen jumyldyrý, ózara tıimdi nátıjeler» atty semınar ótti.
Onda álemniń álemniń 13 elinen kelgen 100-den astam úkimet ókilderi men sarapshylar bas qosty. Shara barysynda Astanadaǵy memlekettik qyzmet salasyndaǵy Óńirlik hab pen Qytaıdyń memlekettik basqarý akademııasy memorandýmǵa qol qoıdy, dep habarlaıdy QazAqparat.
Semınar elderdiń jalpy damýy men yntymaqtastyq aıasyn keńeıtýge zııatkerlik qoldaý kórsetý maqsatynda ótkizildi. Onyń ashylý saltanatynda Óńirlik habtyń basqarýshy komıtet tóraǵasy Álıhan Báımenov sóz sóıledi.
«Kez kelgen ınnovatsııa, álemniń qaı túkpirinde shyqsa da, ol - adamzatqa ortaq ıgilik, álemniń de damýyna qyzmet etýi tıis. Barlyǵynyń ashyq, ınnovatsııalyq jáne jan-jaqty damýy ıdeıasy BUU-nyń turaqty damý maqsattarynda da kórinis tapqan», - dep atap ótti Álıhan Báımenov.
Onyń aıtýynsha, taǵdyry ortaq jahandyq qaýymdastyq qurý tujyrymdamasy men damý maqsattaryn júzege asyrýda progress kóbine basqarý ınstıtýttary tıimdiligine táýeldi.
«Teń teńimen» qaǵıdaty boıynsha tájirıbe almasý, ortaq zertteýler jasaý, sondaı-aq, áriptestikti damytý úkimettiń memlekettik basqarý tıimdiligin arttyrý boıynsha úkimetterdiń umtylystaryna serpin beredi. Sondyqtan, Qazaqstan úkimeti men BUU Damý baǵdarlamasy Astanadaǵy Óńirlik habty qurý bastamasyn kóterdi», - dedi ol.
Qazirgi tańda Habta Amerıka, EO, TMD, Kavkaz jáne ASEAN elderin qosa alǵanda 38 qatysýshy memleket bar. Qytaı - Habtyń quryltaıshylarynyń ári belsendi qatysýshylarynyń biri.
Semınar aýqymynda Hab pen álemdegi memlekettik basqarý salasyndaǵy iri bilim jáne ǵylymı zertteý ınstıtýttarynyń biri - Qytaıdyń memlekettik basqarý akademııasy arasynda memorandýmǵa qol qoıyldy. Bul - eki uıym yntymaqtastyǵynyń jańa kezeńge shyǵýynyń bastaýy.
Akademııanyń atqarýshy vıtse-prezıdenti (vıtse-mınıstr) Ma Dzentan Akademııanyń memlekettik qyzmet salasyndaǵy tájirıbe jáne bilim almasýdyń mańyzdy halyqaralyq ortalyǵy sanalatyn Astana habymen áriptestikti tereńdetý jáne keńeıtý boıynsha yqylasyn jetkizdi.
Memlekettik basqarý boıynsha bul semınar BRIKS (Brazılııa, Reseı, Úndistan, Qytaı, OAR) elderi basshylarynyń bıyl qyrkúıekte Sıamende ótetin kezdesýi qarsańynda ótkizildi.
