Qazaqstan men Qytaı kınoındýstrııa salasynda birlese jumys isteıdi
ASTANA. QazAqparat - Qazaqstan Respýblıkasynyń Mádenıet jáne sport mınıstri A.Muhamedıuly China Film Group Corporation kompanııasynyń prezıdenti Tszıao Hýnfenmen kezdesip, eki eldiń kınematografııa salalaryn birlese damytý máselelerin talqylady. Kezdesý barysynda belgili bolǵandaı, eki tarap aldaǵy ýaqytta birlese kıno túsirilimderin júrgizýge nıetti.
Qytaıdaǵy asa iri kıno korporatsııasynyń basshysyn kútip alǵan Arystanbek Muhamedıuly «aspanasty eliniń» mamandarymen birlese jumys isteý Qazaqstan úshin mańyzdy ekenin jasyrǵan joq.
«Sizdiń elimizge kelýińiz - Qazaqstan men Qytaı kınoındýstrııa salalarynyń damýyna úlken úles qosatyny sózsiz. Qytaı kıno naryǵy álemdegi eń suranysy joǵary kınoındýstrııalardyń biri. QHR-degi aýdıtorııa 800 mıllıon adamnan asatyny taǵy bar. Sondyqtan, Qytaı aýdıtorııasyna óz ónimimizdi shyǵarý - biz úshin úlken múmkindik» dedi A.Muhamedıuly.
Sondaı-aq, mádenıet mınıstri qytaılyq kınostýdııalar men dıstrıbıýtorlardy Qazaqstan naryǵyna kelýge shaqyrdy. «Qazaqstan byltyr DSU-nyń tolyqqandy múshesi atandy jáne biz birlesken jobalarǵa qyzyǵýshylyq tanytamyz», dedi mınıstr.
Al, Tszıao Hýnfen bolsa qonaqjaılyq tanytqany úshin Qazaqstannyń mádenıet mınıstrine alǵysyn aıtyp, aldaǵy ýaqytta seriktestik ornatýǵa daıyn ekenin jetkizdi.
«China Film Group delegatsııasy alǵash ret iskerlik seriktestik ornatý úshin sizderdiń elge kelip otyr. Aldaǵy ýaqytta mundaı sapalar Qazaqstan men Qytaı arasyndaǵy dostyq kópirin odan saıyn nyǵaıta túsetin bolady», - deıdi Qytaı delegatsııasyn bastap kelgen Tszıao Hýnfen. Ol sondaı-aq, nebári jıyrma jyl ishinde tolaǵaı tabystarǵa jetken qazaq kınematografııasyna tańdanyspen qaraıtynyn jetkizdi.
A.Muhamedıuly men Ts.Hýnfenniń arasyndaǵy áńgime negizinen «Kompozıtor» jobasyn júzege asyrý taqyrybynda órbidi. Atalǵan kartına áıgili qytaı sazgeri Sı Sın Haı týraly baıandaıdy. Ol - Qytaı sımfonıkalyq áýeniniń negizin qalaǵan tulǵa. Qazaqstanda turǵan ýaqytynda Sı Sın Haı óz jerlesterin qazaq halqynyń ulttyq án ónerimen tanystyrǵan.
«Sı Sın Haı bizdiń elderdiń arasyndaǵy óner kópirine aınalǵan edi. Sondyqtan, biz onyń Qazaqstandaǵy ómiri men shyǵarmashylyǵy jaıynda birlesken kıno túsirmekpiz. Sondaı-aq, Qazaqstannyń tabıǵaty, tarıhy jaıynda kóp bilgimiz keledi», - deıdi China Film Group korporatsııasynyń basshysy.
A.Muhamedıuly bolsa qytaılyq qonaqqa «Qazaqfılm» túsirgen fılmdermen tanysyp shyǵýǵa keńes berdi. Jıyn qorytyndysyna sáıkes, qos tarap eki eldiń kıno salasyndaǵy seriktestikti úkimetaralyq turǵyda bekitip alýǵa kúsh salýǵa kelisti.
