Qazaqstan men Qytaı kedendik aqparattardy onlaın rejimde almasady
Beıjińde ótip jatqan "Bir beldeý, bir jol" halyqaralyq yntymaqtastyqtyń joǵary deńgeıdegi ekinshi forýmy aıasynda syrtqy saýdanyń kedendik statıstıkasy salasyndaǵy aqparattarmen aldyn ala almasý, ádistemelik jáne aqparattyq ózara is-qımyl týraly hattama, sonymen qatar ókiletti ekonomıkalyq operatorlardy ózara taný týraly memorandým rásimdeldi.
Qujattarǵa QR Qarjy mınıstrligi Memlekettik kirister komıtetiniń tóraǵasy Marat Sultanǵazıev pen QHR Bas keden basqarmasy tóraǵasynyń orynbasary Lı Go QR Premer-Mınıstriniń orynbasary Jeńis Qasymbek pen QHR Bas keden basqarmasynyń tóraǵasy Nı ıÝefenniń kelissózderi aıasynda qol qoıdy.
"Eki eldiń keden qyzmetteri onlaın rejimde júkter týraly, onyń ishinde kedendik quny týraly aqparattardy ózara berýge ýaǵdalasty. Bul tarıhı sheshim. Mundaı ózara is-qımyldyń basty mindeti kedendik statıstıka málimetterindegi aıyrmashylyq deńgeıin tómendetý bolyp sanalady", - dedi M.Sultanǵazıev.
Onyń atap ótýinshe, ókiletti ekonomıkalyq operatorlardy ózara taný týraly memorandýmǵa qol qoıý úshin sońǵy 5 jyl boıy jumys júrgizilgen. Kedendik rásimdeý jáne baqylaý protsedýralaryn jeńildetý Qazaqstannyń ókiletti ekonomıkalyq operatorlaryna Qytaıdyń úlken naryǵyna shyǵýyn jeńildetedi, ımport, eksport jáne logıstıkalyq ınfraqurylymdy damytý úshin jańa múmkinshilikter ashady. Sol arqyly Qazaqstan ekonomıkasynyń munan ary turaqty damýyna jaǵdaı jasaıdy.
Aýyl sharýashylyǵy ónimderi úshin "Jasyl dáliz", birlesken kedendik baqylaý jáne aldyn ala aqparattandyrý syndy mańyzy zor jobalar aıasyndaǵy eki eldiń kedendik qyzmetteriniń yntymaqtastyǵy kedendik qyzmetterdiń arasyndaǵy ózara is-qımyldy nyǵaıtyp qana qoımaı, sonymen birge "Nurly jol" men "Bir beldeý, bir jol" bastamasyn tıimdi ilgeriletýge de múmkindik beredi", - dedi M. Sultanǵazıev.
