Qazaqstan men Qytaı ekijaqty yntymaqtastyqty arttyrady

NUR-SULTAN. QazAqparat - Beıjińde QR Premer-Mınıstriniń birinshi orynbasary ‒ qarjy mınıstri Álıhan Smaıylov pen QHR Memlekettik Keńesi Tóraǵasynyń orynbasary Han Chjenniń tóraǵalyǵymen QR ‒ QHR Yntymaqtastyq komıtetiniń IX otyrysy ótti. Bul týraly QR Úkimetiniń baspasóz qyzmeti habarlaıdy.

QR ‒ QHR Yntymaqtastyq Komıtetiniń IX otyrysynda saýda-ekonomıkalyq, energetıkalyq, ǵylymı-tehnıkalyq, qarjylyq, kólik, mádenı-gýmanıtarlyq, sý jáne ekologııalyq, geologııalyq jáne kedendik yntymaqtastyq pen qaýipsizdik salasyndaǵy 10 mamandandyrylǵan kishi komıtetterdiń jáne eki birlesken komıssııanyń jumys nátıjeleri qaraldy.

Taraptardyń damý maqsattary men tujyrymdamalary uqsas, tyǵyz baılanys pen úılestirý bar, sondaı-aq túrli salalardaǵy yntymaqtastyqtyń sapasy men deńgeıi kún sanap jaqsaryp kele jatqany aıtyldy.

Qazaqstan Respýblıkasy men Qytaı Halyq Respýblıkasy arasyndaǵy saýda-ekonomıkalyq yntymaqtastyqtyń orta merzimdi jáne uzaq merzimdi perspektıvalarǵa baǵyttalǵan (2020-2025 jj.) Birlesken damý josparyn júzege asyrý týraly ýaǵdalastyqqa qol jetkizildi.

QR men QHR arasyndaǵy ózara saýda-sattyq aıasyn keńeıtý maqsatynda Qytaıǵa qazaqstandyq eksporttyq ónimderdi, onyń ishinde energetıka men aýylsharýashylyq ónimderin jetkizý kólemin arttyrý týraly kelisim jasaldy.

Otyrys qorytyndysy boıynsha Komıtet tóraǵalary Hattamaǵa qol qoıdy.

Taraptar Komıtettiń H otyrysyn 2021 jyly Qazaqstanda ótkizýge kelisti.