Qazaqstan men Qytaı birlesken azyq-túlik ónimi zerthanasyn ashýy múmkin

ASTANA. QazAqparat - 2017 jyldyń 1 shildesi men 1 qazan aralyǵynda «Qorǵas» ShYHU» aýmaǵynda «EKSPO ShYU» alańynda qazaqstandyq óndirýshiler taýarynyń kórmesi ótedi. Oǵan orta eseppen alǵanda Qytaı men ShYU elderinen 100 myń qonaq keledi dep kútiledi, dep habarlaıdy «Atameken» UKP baspasóz qyzmeti.

2016 jyly shekara mańy yntymaqtastyq ortalyǵyna 3 mıllıonnan astam adam barǵan. Onyń ishinde 2,5 mln. adam Qytaı tarapynan kelgen. Olardyń qatarynda jańa yntymaqtastyq izdegen kásipkerler, týrıster men turǵyndar bar.

«Kórmege qatysý Qytaıdyń aýqymdy naryǵyna óz ónimin tanystyrýǵa múmkindik beredi. «Qorǵas» aýmaǵynda qazaqstandyq kásipkerler óte az. Jaqynda reseılik óndirýshilerden kórmege qatysý týraly usynys tústi. Otandyq kompanııalardyń áleýeti zor ǵoı. Kásiporynǵa kórsetiletin qyzmetterdiń ishinde aýdarmashy bar. Ol iskerlik kelissózder jasaǵanda kómektesedi», - dep atap ótti QR ShYU Іskerik keńesi baǵdarlamasynyń jetekshisi Zarına Janserkeeva.

Sonymen qatar jetekshiniń aıtýynsha, týrıster qazaqstandyq azyq-túlikke qyzyǵady. Biraq ár eldiń sanıtarlyq-epıdemıologııalyq talaptary ártúrli. Búginde birlesken Qazaqstan-Qytaı zerthanasyn ashý týraly másele qarastyryp jatyr.

«14 mamyrda eki el arasynda 100 myń tonna shoshqa etin jetkizý týraly hattamaǵa qol qoıyldy. Qazaqstanda mundaı kólemde et joq. Naryqty zertteı kele ınvestor taptyq, joba daıyndap, ony keshen salý úshin jer bóletin ákimdikke joldadyq. Keshenniń ishinde jem daıyndaıtyn zaýyt, etti qaıta óńdeıtin tseh pen qı óńdeıtin kombınat bolady. Bul «Qorǵastyń» iskerlik kelisimge kelý aımaǵyna aınalǵanynyń jaqsy mysaly bola alady», - dedi Zarına Janserkeeva.

«Qorǵas» aýmaǵynda vızasyz 30 kún bolýǵa múmkindik jasalǵan.