Qazaqstan men Qytaı birlesken 12 jobany iske asyrady
TALDYQORǴAN. QazAqparat - Aldaǵy eki-úsh jyldyń ishinde Almaty oblysynda qazaqstandyq-qytaılyq aýqymdy 12 jobany iske asyrý josparlanýda, dep habarlaıdy QazAqparat tilshisi.
Olardyń qatarynan Shelek dálizindegi jel elektr stansysyn, qurylys materıaldaryn daıyndaıtyn óndiristik kásiporyndy jáne Taldyqorǵan-Óskemen arasyndaǵy avtojoldy jańǵyrtý jumystaryn atap ótýge bolady.
Bul jóninde oblystyq Kásipkerlik jáne ındýstrıaldy-ınnovatsııalyq damý basqarmasynyń basshysy Marjan Murat málim etti.
Brıfıng barysynda basqarma basshysy ótken jyly atqarylǵan jumystarǵa toqtaldy. Máselen, 2016 jyldyń qańtar-qarasha aılarynda Almaty oblysynyń syrtqy saýda taýar aınalymy 1400,5 mln. AQSh dollaryn qurady. Eksport 290,5 mln, al ımport 1110 mln. AQSh dollaryna jetti.
Jalpy Almaty oblysy álemniń 108 memleketimen saýda-sattyq júrgizedi. 41 memleketke taýar satylsa, 83 memlekettiń ónimi ákelinedi.
