Qazaqstan men Qytaı bastamalary Uly jibek jolynyń jandanýyna septigin tıgizedi - Nazarbaev
Nursultan Nazarbaevtyń quttyqtaý hatynda Qytaıdyń «Jibek joly ekonomıkalyq beldeýi» qurý bastamasy men Qazaqstanda júzege asyrylyp jatqan «Nurly jol» memlekettik baǵdarlamasy Uly Eýrazııa transqurlyqtyq magıstralynyń - Jibek jolynyń jandanýyna septigin tıgizetindigi aıtylǵan.
«Osy jylǵy Qazaqstandaǵy qytaıdyń týrızm jyly bizdiń dostas elderimizdiń halyqtaryn odan ary jaqyndata túsetindigi sózsiz», - dep atap ótedi Qazaqstan Prezıdenti.
Al Sı Tszınpın aldaǵy ýaqytta Uly Jibek jolynyń mańyzdy elderine aınalatyn Qazaqstan men Qytaı órkenıetter arasyndaǵy alys-beriske aıtarlyq zor úles qosatyndyǵyn basa atap ótken.
«QHR men Qazaqstan arasynda dıplomatııalyq baılanys ornaǵannan keıingi 25 jylda memlekettik qarym-qatynas qarqyndy damýǵa ıe boldy. Eki el de joǵary deńgeıdegi tyǵyz baılanystardy qoldap, saıası ózara senimdi únemi nyǵaıtyp, tájirıbelik yntymaqtastyqty jan-jaqty ilgeriletip otyrdy (...). Qytaılyq-qazaqstandyq jalpyqamtymdy strategııalyq seriktestik damýdyń munan da joǵary deńgeıine kóterilip keledi», - dep jazdy qytaı basshysy.
Onyń aıtýynsha, Qytaı men Qazaqstan birlesip shyǵarǵan bul fotoalbom búkil álemge eki eldiń ǵajaıyp tabıǵı jáne mádenı nysandaryn pash etedi jáne eki memleket halyqtary arasyndaǵy dostyqtyń iske asyrylýyn kórsetedi.
Esterińizge sala ketsek , keshe Astanada Beıbitshlik jáne kelisim saraıynda «Kórikti Qazaqstan - Kórkem Qytaı» foto kórmesi ashyldy. Mádenı shara Qazaqstan men Qytaıdyń arasyndaǵy dıplomatııalyq qarym-qatynastyń 25 jyldyǵyna arnalǵan. Kórmeni QR Aqparat jáne kommýnıkatsııalar mınıstrligi, QHR Memlekettik keńesi baspasóz keńsesi, QHR-daǵy Qazaqstan Elshiligi, Qazaqstandaǵy QHR Elshiligi, QHR Ádebı týyndylardyń shet tilderinde basylýy jáne taralýy jónindegi basqarmasy birlesip uıymdastyrǵan. Foto kórmeniń atqarýshy organy - «QazAqparat» HAA men Qytaıdyń « Jenmın hýabao» jýrnaly.
Shara 10 maýsymǵa deıin jalǵasady.
