Qazaqstan men Qytaı arasyndaǵy memlekettik shekara rejımi týraly kelisim qabyldandy - Senat
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy Qazaqstan-Qytaı memlekettik shekarasynyń rejımi týraly kelisimdi ratıfıkatsııalaý týraly» QR Zańy qabyldandy. Endi Parlament qabyldaǵan qujat memleket basshysynyń qol qoıýyna joldanady.
Kelisim 2006 jylǵy 20 jeltoqsanda Beıjiń qalasynda jasalǵan bolatyn. Bul rette qujat aýmaqtarǵa qol suǵylmaýshylyqty qamtamasyz etý, quqyqqa qarsy áreketterdiń jolyn kesý, shekaradaǵy tosyn oqıǵalardy sheshý joldaryn belgileý máselelerin qarastyrady. Sonymen qatar, kelisimde Qazaqstan men Qytaı memleketteriniń shekara ókilderiniń ózara is-qımyl tártibin retteýge baǵyttalǵan normalar qamtylyp otyr.
Budan basqa, qujat boıynsha eki el arasyndaǵy memlekettik shekara syzyǵy memlekettik shekaranyń delımıtatsııasy týraly kelisimmen anyqtalǵany kórsetilgen. Sonymen qosa, taraptar memlekettik shekaranyń demarkatsııasy týraly qujat kúshine engennen keıin on jylda bir ret memlekettik shekara syzyǵyna birlesken tekserýlerdi júrgizip turatyn bolady.
Tutastaı alǵanda, kelisimdi ratıfıkatsııalaý Qazaqstan men Qytaı arasyndaǵy tatý kórshilik qarym-qatynasty odan ári nyǵaıtýǵa jáne ekijaqty yntymaqtastyqty damytýǵa yqpal etetin bolady.
