Qazaqstan men Qytaı arasyndaǵy 23 áýe reısi túgel toqtatylady - Talǵat Lastaev

NUR-SULTAN. QazAqparat – Azamattyq avıatsııa komıtetiniń tóraǵasy Talǵat Lastaev 3 aqpannan bastap Qytaı Halyq Respýblıkasymen turaqty áýe qatynasy ýaqytsha toqtaıtynyn málim etti, dep habarlaıdy QazAqparat tilshisi.

Eki el arasyndaǵy turaqty reısterdi qazaqstandyq «Eır Astana», «SCAT» jáne qytaılyq «China Southern Airlines», «Air China» áýe kompanııalary Nur-Sultan, Almaty jáne Qytaıdyń Beıjiń, Úrimshi, Sıan, Sanıa, Haıkoý qalalary arasynda (23 áýe reısi) oryndap kelgen edi. Tıisinshe, osy reısterge bılet alǵan jolaýshylardyń bárine bılettiń tolyq quny qaıtarylady», - dedi Talǵat Lastaev mınıstrlikte ótken baspasóz máslıhatynda.

Onyń aıtýynsha, 3 aqpannan bastap atalǵan reısterge bılet alǵandar ony satyp alǵan jerlerine qaıtara alady. Bıletter úshin aqsha aıyppulsyz rásimdelip, tolyq kólemde qaıtarylady. Qalyp qoıǵan jolaýshylardy elge qaıtarý úshin Beıjiń jáne Úrimshi qalalarynan qosymsha reıster uıymdastyrylady.

Eske sala ketsek, búgin QR Úkimeti janyndaǵy vedomstvoaralyq komıssııa Qazaqstan aýmaǵynda koronavırýstyń taralýyna jol bermeý boıynsha birqatar qosymsha qorǵaný sharalaryn qabyldady.