Qazaqstan men Qytaı arasynda radıoaktıvti qaldyqty ótkizýge tyıym salatyn zań qabyldandy
«Bul qujat ıadrolyq, radıatsııalyq qaýipti zattardy zańsyz ótkizýdi bolǵyzbaý maqsatynda kedendik baqylaý salasyndaǵy Taraptardyń yntymaqtastyǵyn keńeıtýge jáne tereńdetýge múmkindik beredi. Atap aıtqanda, zamanaýı tehnologııalardy engizý máseleleri boıynsha yntymaqtastyq, birlesken oqý-jattyǵýlar men oqytý semınarlaryn ótkizý eskerilgen. Ekinshiden, radıatsııalyq qaýipsizdikti qamtamasyz etý salasyndaǵy Taraptardyń halyqaralyq mindettemelerdi oryndaýyn qamtamasyz etýge múmkindik beredi. Osy oraıda, taraptardyń keden shekarasyndaǵy ótkizý pýnktterinde radıatsııalyq baqylaý júrgizý, azamattardyń radıatsııalyq qaýipsizdigin qamtamasyz etý qamtylǵan», - dedi QR Premer-Mınıstriniń orynbasary – Qarjy mınıstri Erulan Jamaýbaev.
Onyń aıtýynsha, úshinshiden, taraptar memleketteriniń zańnamasyna sáıkes, ákelýge tyıym salynǵan ıadrolyq, radıatsııalyq qaýipti zattardy el aýmaǵyna tasymaldaýǵa jol bermeýge múmkindik beredi. Bul turǵyda radıatsııa aıasy belgilengen normalardan asatyn taýarlar men kólik quraldaryn tasymaldaýǵa qatysty Taraptar memleketteri zańnamasynyń talaptary saqtalmaǵan jaǵdaıda, mundaı taýarlardy ekinshi Tarap memleketiniń aýmaǵyna áketýge jol berilmeıdi.
«Birlesken radıatsııalyq baqylaýdy júrgizý tártibin Taraptar memleketteriniń keden organdarynyń ókilderinen jáne oqý ortalyqtarynyń mamandarynan turatyn birlesken jumys toby aıqyndaıtyn bolady. Osy Kelisimdi ratıfıkatsııalaý Qazaqstan men Qytaı arasyndaǵy ıadrolyq materıaldardy, radıoaktıvti materıaldardy, radıoaktıvti qaldyqtardy jáne radıatsııaly qaýipti zattardy zańsyz ótkizýdi boldyrmaý rásimine qatysty máselelerdi neǵurlym naqty jáne neǵurlym tıimdi quqyqtyq retteýge yqpal etetin bolady. Kelisimdi iske asyrý respýblıkalyq bıýdjetten qosymsha qarjy shyǵyndaryn talap etpeıdi», - dedi mınıstr.
