Qazaqstan men Qytaı arasynda əleýetti ekonomıkalyq baılanys ornady - QHR elshisi
ASTANA. QazAqparat - QHR-dyń Qazaqstandaǵy Tótenshe jəne Ókiletti Elshisi Chjan Hanhýeı eki el arasynda əleýetti ekonomıkalyq yntymaqtastyq ornaǵandyǵyn atap ótti. Astanada ótip jatqan «Bir beldeý - bir jol» atty halyqaralyq konferentsııa barysynda osyndaı oıyn jetkizgen elshi ekonomıkalyq yntymaqtastyqtyń osyndaı serpilisin naqty tsıfrlarmen mazmundady.
«2015 jyly eki el jalpy somasy 24 mlrd dollardy quraıtyn 52 iri joba týraly óz deńgeılerindegi kelisim men kelisimsharttarǵa qol qoıdy. Ózge salalardaǵy jobalardy qosa alǵanda, yntymaqtastyq týraly kelisim men kelisimsharttardyń jalpy somasy 50 mlrd dollardy qurady. Eki el arasyndaǵy qarym-qatynastyń tarıhynda osyndaı əleýetti ekonomıkalyq yntymaqtastyq bolmaǵan», - dep atap ótti Elshi.
Jahandyq ekonomıkalyq daǵdarystyń salqyny eki elge de sezilgenin ataı kele Chjan Hanhýeı Qazaqstannyń Úkimeti daǵdarysqa qarsy tıimdi sharalardy qolǵa alyp otyrǵanyn atap ótti.
«Qazaqstan Úkimeti qolǵa alyp otyrǵan sharalar óte tıimdi. Sondyqtan, qazaq halqy bul qıyndyqtardan da ótip, ekonomıkalyq damýdyń jańa satysyna shyǵady degen senimdemin. Qazirdiń ózinde Qazaqstannyń kúsh-qýatyn baıqap otyrmyn»,-deıdi elshi.
