Qazaqstan men Qytaı agrarlyq yntymaqtastyqtyń úlgilik aımaǵyn qurady
ASTANA. QazAqparat - Qazaqstan men Qytaı agrarlyq yntymaqtastyqtyń úlgilik aımaǵyn qurady. Bul týraly búgin Qazaq-Qytaı agrarlyq-ınvestıtsııalyq forýmynda QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov aıtty, dep habarlaıdy QazAqparat.
«Qazaqstan Respýblıkasynyń Aýyl sharýashylyǵy mınıstrligi men Qytaı halyq Respýblıkasynyń Aýyl sharýashylyǵy mınıstrligi arasynda «Ulttyq agrarlyq ǵylym-bilim ortalyǵy» bazasynda agrarlyq yntymaqtastyqtyń úlgilik aımaǵyn qurý týraly ózara túsinistik memorandýmyna qol qoıyldy. Ol aýyl sharýashylyǵyndaǵy birlesken qaıta óńdeý óndiristerin qurýǵa jáne ınnovatsııa engizýge septigin tıgizetin bolady», - dedi Asqar Myrzahmetov.
Aıta keterligi, osy forýmnyń aıasynda jalpy quny 160 mln. dollardy quraıtyn 7 qujatqa qol qoıyldy. Atalǵan qujattardyń ishinde 3 saýda kelisimi bar. Oǵan sáıkes bizdiń «Azyq-túlik kelisimshart» korporatsııamyz 200 myń tonna astyq pen 100 myń tonna maıly daqyldardy Qytaıǵa jetkizetin bolady. Sonymen qatar elderimiz arasyndaǵy shekaralyq aımaqta astyq pen maıly daqyldardy saqtaýǵa arnalǵan termınal qurylysy da bastalady.
