Qazaqstan men Qytaı 35 jobaǵa qol qoıdy
ASTANA. QazAqparat - Qazaqstan men Qytaı áriptestigi tyń jobalarmen tolyqty. Eki el kásipkerleri birlesken jańa 35 jobany júzege asyrýǵa baılanysty kelisim jasady.
Bul jaıynda «Qorǵas» shekara mańy yntymaqtastyǵy halyqaralyq ortalyǵynda ótken bıznes-forýmda belgili boldy, dep habarlaıdy 24.kz.
Qorǵas - Qazaqstan men Qytaı shekarasynyń túıisken tusy ǵana emes, strategııalyq seriktestikke serpin beretin ortalyq. Kórshiles eldiń kásipkerleri taǵy qol alysyp, 3 mlrd dollardan asatyn birlesken jobalaryn jasaımyz degen sheshimge keldi. Olar saýda, ónerkásip, ǵylym, bilim jáne týrızm salalaryn qamtıdy.
«Qorǵas» ShYHO» AQ ákimshilik komıtetiniń prezıdenti Qaharman Djazınniń aıtýynsha, Jarkent pen Qorǵas qalalarynyń arasyndaǵy dostyq týraly kelisimge qol qoıyldy. Bıyl saýda kesheni, qonaq úıler, bıznes ortalyǵy sııaqty jańa nysandar paıdalanýǵa berilmek. Sondaı-aq oıyn-saýyq ortalyǵynyń qurylysy bastalady. Bul nysandar qytaılyq týrısterdi tartatyn bolady.
«Osy bıznes forýmnyń arqasynda biz qazaqstandyq kompanııamen kelisim jasadyq. 120 mıllıon ıýan ınvestıtsııa salatyn oıymyz bar»,-deıdi Qorǵas qalasyndaǵy halyqaralyq kompanııanyń dırektorynyń ıÝı Chenchjýn.
Investorlar men kásipkerlerdiń tikeleı dıalogy túrinde ótkiziletin mundaı forým Qorǵasta alǵash ret uıymdastyrylyp otyr. Qatysýshylar jıynda ózderin tolǵandyrǵan barlyq máseleni talqylady. Munaı jıyn iskerlik týrızm, saýda, mádenıet jáne gýmanıtarlyq saladaǵy qarym-qatynasty damytýǵa jańa múmkindikter ashady.
«Qorǵas» erkin ekonomıka aımaǵy ákimshilik komıteti basshysynyń orynbasary Ý Haonyń pikirinshe, «Bir beldeý, bir jol» bastamasynyń aıasynda «Qorǵas» shekara yntymaqtastyǵy ortalyǵynda tyń naryqty ıgeretin múmkindikter paıda boldy. «Bul jerde Qytaı ǵana emes, Eýrazııalyq ekonomıkalyq odaq, TMD elderi men Ońtústik-Shyǵys Azııadaǵy memleketterge shyǵýǵa bolady».
«Qorǵas» shekara mańy yntymaqtastyǵy halyqaralyq ortalyǵy taıaýda erkin ekonomıkalyq aımaq mártebesine ıe boldy. Endi kásipkerler negizgi salyqtan bosatylyp, áleýmettik salyqty ǵana tóleıdi. Forýmǵa qatysýshylardyń aıtýynsha, bul jeńildik Qytaı ınvestorlaryn Qazaqstanǵa tartýǵa septigin tıgizbek.
