Qazaqstan men Qyrǵyzstannyń zııalylary baılanysty úzbeýi kerek - qyrǵyz depýtaty
«Eki el arasyndaǵy dostyqty nyǵaıtatyn mundaı forýmdardyń uıymdastyrylǵanyna qýanyshtymyn. Ásirese, bizdegi sońǵy saılaýdan keıin eki el arasyndaǵy ortaq sharanyń uıymdastyrylǵany qýantady. Keıde teledıdardan Nursultan Nazarbaev sóılegende, muqııat tyńdaımyz. Óz sózinde Nazarbaevtyń qazaq pen qyrǵyzdyń dostyǵyn, ǵasyrlar boıy jalǵasqan dástúr men mádenı baılanysyn erekshe atap ótetini qýantady», - dedi Sadyq Sher-Nııaz.
Qyrǵyzstandyq depýtat qazaq pen qyrǵyzdyń baýyrlas halyqtar ekenin, olardyń qarym-qatynasy joǵary deńgeıde bolýy tıistigin atap ótti.
«Eń aldymen eki eldiń zııalylary qarym-qatynasty nyǵaıtýlary kerek. Abaı Qunanbaıuly, Muhtar Áýezov, Shyńǵys Aıtmatovtar - qos halyqqa ortaq tulǵalar boldy. Olar ǵasyrlar boıy jalǵasqan uly joldy jalǵastyrdy. Endigi bizdiń mindetimiz - osy joldy jalǵastyrý. Mundaı sharalar qos halyqtyń óskeleń urpaǵyna oń áser beredi. Dál osyndaı sharalar Qazaqstan men Qyrǵyzstanda birdeı qurmetke ıe bolatyn jańa talanttardy, jańa esimderdi tanytýǵa múmkindik beredi», - dedi ol.
Sonymen birge, S. Sher-Nııaz ortaq tarıh pen ortaq mádenıettiń eshqandaı daýǵa jol bermeıtinin basa aıtty.
«Meniń oıymsha, eki el arasyndaǵy qarym-qatynas eshqashan shıelenisken joq. Árıne, tarıhta túri oqıǵalar boldy, biraq bul - baýyrlas halyqtarǵa ǵana tán qubylys. Bizdiń ortaq tarıhymyz, turmysymyz ben mádenıetimiz aradaǵy qarym-qatynastyń qıyndaýyna jol bermeıdi», - dep óz sózin túıindedi Sadyq Sher-Nııaz.
Aıta keteıik, Astanada Shyńǵys Aıtmatovtyń 90 jyldyǵyna arnalǵan «Aıtmatov taǵylymy» atty halyqaralyq forým ótip jatyr. Forým aıasynda Qyrǵyzstannyń eks-Memlekettik hatshysy, professor Osmanakýn Ibraımovtyń «Aıtmatov. Poslednıı pısatel ımperıı» atty jańa jańa kitaby tanystyryldy.
