Qazaqstan men Qyrǵyzstandy jalǵaıtyn jańǵyrtylǵan ótkizý pýnkti ashyldy
Qazaqstan Premer-Mınıstri Asqar Mamın men Qyrǵyzstannyń Premer-Mınıstri Ýlýkbek Marıpov Úkimetaralyq keńestiń IX otyrysyn ótkizip, eki eldiń memlekettik shekarasynda jańǵyrtylǵan «Qordaı — Aq Jol» ótkizý pýnktiniń ashylý rásimine qatysty.
Úkimetaralyq keńes otyrysynda saýda-ekonomıkalyq, ınvestıtsııalyq, aýyl sharýashylyǵy, sý-energetıkalyq, tranzıttik-kólik, týrıstik, ǵarysh jáne IT salalaryndaǵy, ónerkásiptik kooperatsııadaǵy, sondaı-aq bilim berý, mádenıet, densaýlyq saqtaý, halyqty áleýmettik qorǵaý jáne eńbek kóshi-qony, qorshaǵan ortany qorǵaý, óńiraralyq jáne shekara mańy yntymaqtastyǵy, EAEO jáne basqa da ıntegratsııalyq birlestikter sheńberindegi ózara is-qımyl salalaryndaǵy yntymaqtastyqtyń ózekti máseleleri qaraldy.
Taraptar «Qarasý — Aq Tilek» ótkizý pýnktinde «Alataý» birlesken Transshekaralyq saýda ortalyǵyn (TSO) qurý perspektıvasyn talqylady. Ortalyq bazasynda jemis-kókónis ónimderiniń zamanaýı qoımalaryn, sondaı-aq sertıfıkattaý, sanıtarlyq jáne fıtosanıtarlyq baqylaý organdaryn ornalastyrý kózdelip otyr, bul AÓK ónimderin qaıta óńdeýdegi yntymaqtastyqty damytýǵa yqpal etetin bolady. TSO alańynda Qazaqstan men Qyrǵyzstan ónerkásiptik kooperatsııasyn damytý úshin ındýstrııalyq aımaq qurý josparlanýda. Qyrǵyzstannyń Shý jáne Ystyqkól oblystarynda jalpy ınvestıtsııa kólemi $25 mln quraıtyn jáne aýystyryp tıeý qýaty jylyna 26 myń tonna bolatyn kóterme-taratý ortalyqtaryn salý máselesi qaraldy.
Aýyl sharýashylyǵy salasyndaǵy yntymaqtastyqty damytý perspektıvasy, «Besaǵash — Kıchı Kapka» ótkizý pýnktin jáne Qazaqstan-Qyrǵyzstan shekarasyndaǵy basqa da ótkelderdi jańǵyrtý, eki eldiń Óńiraralyq yntymaqtastyq forýmyn ótkizý, taý baǵyttary boıynsha týrıstik toptar uıymdastyrǵan memlekettik shekarany kesip ótý tártibi týraly úkimetaralyq kelisim jasasý jáne t. b. talqylandy.
Qazaqstan Úkimetiniń basshysy ınfraqurylymda, kólikte, ónerkásiptik kooperatsııada transshekaralyq baılanystardy kúsheıtýge, sondaı-aq azyq-túlik qaýipsizdigin nyǵaıtýǵa baǵyttalǵan aýqymdy tolassyz ıntegratsııalyq jobalardy iske asyrý arqyly EAEO sheńberinde eki eldiń ınvestıtsııalyq yntymaqtastyǵyn arttyrýdyń mańyzdylyǵyn atap ótti. A. Mamın sondaı-aq navıgatsııalyq plombalardy paıdalaný tájirıbesin keńeıtý jáne fıskaldyq organdardyń málimetterimen onlaın almasý arqyly eki el arasynda taýarlardyń ótýi úshin «jasyl dáliz» qurý qajettigine nazar aýdardy.
Memleket basshysy Qasym-Jomart Toqaevtyń tapsyrmasy boıynsha Qazaqstan jaqynda Qyrǵyzstanǵa 10 myń tonna bıdaı uny jáne 1 myń tonna kúzdik bıdaıdyń ónimdiligi joǵary tuqymy túrinde gýmanıtarlyq kómek kórsetedi. Kelissózder qorytyndysy boıynsha Qazaqstan-Qyrǵyz Úkimetaralyq keńesiniń 9-shy otyrysynyń hattamasyna, sondaı-aq «Qorǵas» ShYHO» AEA men Qyrǵyzstannyń «Naryn» AEA arasyndaǵy yntymaqtastyq týraly memorandýmǵa qol qoıyldy.
Úkimet basshylary jańǵyrtylǵan «Qordaı (Qazaqstan) — Aq Jol (Qyrǵyzstan)» ótkizý pýnktiniń ashylý rásimine qatysty. 2020-2021 jyldary júrgizilgen qaıta jóndeýden keıin ótkizý pýnktiniń qurylys alańy 3,5 ese, 4,9 myń sharshy metrge deıin, qozǵalys jolaqtarynyń sany 2-den 8-ge deıin, pasporttyq baqylaý kabınalarynyń sany 13-ten 34-ke deıin ulǵaıtyldy, zamanaýı ınspektsııalyq-tekserý keshenderi ornatyldy. Qabyldanǵan sharalardyń nátıjesinde pýnkttiń ótkizý múmkindigi táýligine 1 myńnan 2,5 myń avtomobılge deıin jáne 6 myńnan 25 myń adamǵa deıin ósti, bul Qazaqstan Respýblıkasy men Qyrǵyz Respýblıkasynyń saýda-ekonomıkalyq yntymaqtastyǵyn damytýǵa mýltıplıkatıvtik áser etedi.
