Qazaqstan men Qyrǵyzstan taýar aınalymyn 1 mlrd dollarǵa jetkizbek
BІShKEK. QazAqparat – Qazaqstan men Qyrǵyzstan taýar aınalymyn 1 mlrd AQSh dollaryna jetkizbek. Bul týraly Bishkekke memlekettik saparmen kelgen QR Prezıdenti Qasym-Jomart Toqaev málim etti, dep habarlaıdy QazAqparat tilshisi.
«Saýda-ekonomıkalyq baılanystardy damytýǵa erekshe nazar aýdardyq. 2015 jyldan beri eýrazııalyq ıntegratsııa jaǵdaıynda jumysty bastadyq. EAEO-ǵa múshelik bizdiń ekonomıkalyq qatynastardy keńeıtýge jańa múmkindikterdi ashty. Ekijaqty taýar aınalymy 2015 jyldan 2018 jyl aralyǵynda 30 paıyzǵa artyp, 900 mln dollardy qurady. Búginde bizdiń elimiz Qyrǵyzstannyń aldyńǵy qatarly saýda seriktesteriniń biri bolyp otyr», - dedi Q. Toqaev Qyrǵyzstan Prezıdenti Sooronbaı Jeenbekovpen bolǵan kelissózderden keıin.
Osy oraıda Memleket basshysy qazirgi kezde Qyrǵyzstan Qazaqstannyń Ortalyq Azııadaǵy negizgi saýda seriktesi ekenin eske saldy.
«Bul turǵyda saýda kórsetkishteriniń kólemi osymen shektelmeýi tıis ekenin túsinemiz. Bizdiń taıaýdaǵy maqsatymyzda taýar aınalymyn 1 mlrd AQSh dollaryna jetkizý eskerilgen. Osyǵan baılanysty ekijaqty saýdanyń nomenklatýrasyn keńeıtý boıynsha jáne jańa naryqtyq baǵyttardy izdestirýge qatysty tapsyrmalar berdik», - dedi Qasym-Jomart Toqaev.
