Qazaqstan men Qyrǵyzstan Talas ózeniniń sýyn bólisýge ýaǵdalasty
TARAZ. QazAqparat - Jambyl oblysynyń delegatsııasy Qyrǵyzstan Respýblıkasynyń Talas oblysy Talas qalasyna saparlap qaıtty.
Eki shekaralas oblystardyń basshylary kezdesý barysynda saýda-sattyq, aýyl sharýashylyǵy, Talas pen Shý transshekaralyq ózenderiniń sý qoryn bólisý jaıttaryn talqylaǵan bolatyn, dep habarlaıdy QazAqparat tilshisi Jambyl oblysy ákimine silteme jasap.
«Byltyr 2016 jyly Jambyl oblysy ákimdigi men Qyrǵyz Respýblıkasy Talas oblysynyń úkimeti quzyrly ókilderiniń arasynda saýda, aýyl sharýashylyǵy, veterınarııa jáne fıtosanıtarııa ahýaly, sonymen qatar Talas ózeniniń sýyn bólisý boıynsha áriptestik týraly memorandýmǵa qol qoıdy», - dedi Jambyl oblysynyń ákimi Kárim Kókirekbaev.
Oblys basshysynyń aıtýynsha, Jambyl óńirinde jyl saıyn azyq-túlikke degen suranys artýda, sol sebepti aýyl sharýashylyǵynda egistik jerlerdiń kólemi de artýda.
Osyǵan oraı jambyldyq baǵbandar ylǵal saqtaǵysh tehnologııalardy belsendi paıdalanýda. Alaıda sýarmaly sý máselesin sheshý úshin bul azdyq etip otyr. Jambyl oblysy sýarý maýsymy kezinde bul tirshilik kóziniń 2,8 - 3 mlrd. tekshe metrin qajet etedi. Bul sýdyń 80 paıyzy Qyrǵyzstannan alynady. Jambyl oblysyndaǵy 173 myń gektar jer Qyrǵyzstannan keletin sýmen sýarylady.
Kezdesý barysynda Shý men Talas ózenderiniń sýyn bólisý týraly erejege sáıkes, memleketter arasynda sý resýrstaryn bólisýdiń mańyzdylyǵy atap ótildi.
Ákimniń aıtýyna qaraǵanda, ózara úılesimdi jumystyń bolmaǵanynan 2016 jyly Kırov sý qoımasynan sý aǵyzý oqıǵalary oryn alǵan. Saldarynan birshama aýyldardy sý basyp ketti, ondaǵan mıllıon teńge shyǵyn keldi. Osyǵan baılanysty oblys basshysy, 2017 jylǵa arnalǵan Kırov sý qoımasynyń birlese kelisilgen jumys kestesin jasaýdy usyndy. 
