Qazaqstan men Qyrǵyzstan shekarasynda zań buzýshylar tastap ketken avtokólikter tabyldy
ASTANA. QazAqparat - Taraz shekara jasaǵynyń «Granıtogorsk» shekara beketiniń jasaǵy kezekshilik kezinde ıesiz qalǵan eki avtokólikti taýyp alǵan. Bul týraly QR UQK ShQ baspasóz qyzmetinen habarlady.
Mercedes-Benz jáne Range Rover mashınalary Qazaqstannan Qyrǵyzstanǵa mashına aıdaý kezinde tabylǵan. Ekonomıkalyq kontrabandany júzege asyrǵan belgisiz bireýler shekaradaǵy jasaqty baıqap qalyp, avtokólikterin tastap, irgeles el aýmaǵyna jasyrynyp qalǵan.
Tekserý barysynda memlekettik shekarany buzý belgileri - ınjenerlik qorshaýdyń mehanıkalyq zaqymdalǵany anyqtaldy.
Atalǵan fakti boıynsha quqyq qorǵaý organdaryna habar berildi. Tergeý júrgizilip jatyr.
