Qazaqstan men Qyrǵyzstan shekarasynda ındýstrıaldy saýda-logıstıkalyq kesheni salynady
QR Premer-Mınıstriniń orynbasary – saýda jáne ıntegratsııa mınıstri Serik Jumanǵarın men Jambyl oblysynyń ákimi Nurjan Nurjigitov Qordaı aýdanyndaǵy «Qarasý» baqylaý-ótkizý beketinde bolyp, Qazaqstan men Qyrǵyzstan shekarasynda boı kóteretin ındýstrıaldy saýda-logıstıkalyq kesheniniń jospar-jobasymen tanysty.
«Elimiz boıynsha mundaı 5 nysan bolady. Sonyń biri osy Qordaıdaǵy keshen desek, mundaǵy qurylys jumystary 2025 jylǵa deıin tolyǵymen aıaqtalady dep josparlanyp otyr. Ol óz kezeginde tranzıttik áleýetti arttyrýǵa múmkindik beredi. Qazir saýda-logıstıkalyq ortalyqtyń basym baǵyttary belgilenip jatyr. Bul – óndiriste báselestik artyqshylyqtary bar taýarlardy shyǵarý, aýylsharýashylyǵy ónimderin saqtaý men óńdeýge arnalǵan oryndardy qurý, jeńil ónerkásip salasynda kooperatsııalyq óndiristi damytý, halyqaralyq taýar óndirý júıe salasynda logıstıkalyq nysandar salý», - dedi Serik Jumanǵarın.
Aýmaqta qoıma, óndiris ǵımarattary men júk tıeý alańdary ornalasady. Eń jaqyn óndirýshiler – Qyrǵyzstandaǵy Shý oblysy men Qazaqstandaǵy Jambyl oblysynyń kásiporyndary jáne fermerlik sharýashylyqtar. Al basty tutynýshylary – Almaty, Bishkek pen Taraz qalalary.
Aıta keteıik, ındýstrıaldy saýda-logıstıkalyq keshen «Qarasý» jáne «Aq Tilek» ótkizý pýnktterinde salynady. Jambyl oblysynyń ákimdigi qurylysqa aýmaǵy 39 gektar jer telimin bóldi, kólemi 100 gektar jer telimin qosymsha bólý týraly másele qarastyrylyp jatyr.
Sondaı-aq, jańa keshenniń qyzmetin retteý týraly úkimetaralyq kelisim jobasy jasalǵan.
Keshen aýmaǵynda agroónerkásiptik ónimder saqtaý jáne óńdeý josparlanyp otyr. Budan bólek, ındýstrıaldy saýda-logıstıkalyq keshen EAEO halyqaralyq taýar óndirý jelileri júıesinde ónerkásiptik kooperatsııany júzege asyrady. Logıstıkalyq obektiler salynyp, halyqaralyq taýar ótkizý jelileri júıesine odan ári ıntegratsııalanatyn qyzmetter qurylmaq.
