Qazaqstan men Qyrǵyzstan saýda-ekonomıkalyq yntymaqtastyqty tereńdetýge múddeli
ASTANA. QazAqparat - Bishkek qalasynda ótip jatqan Qazaq-qyrǵyz iskerlik keńesiniń birinshi otyrysy aıasyndaǵy bıznes-forýmǵa 14 qazaqstandyq kásiporyn ókilderi qatysýda, dep habarlaıdy QazAqparat tilshisi.
Qyrǵyzstan Saýda-ónerkásip palatasynyń prezıdenti Marat Sharshekeevtiń derekterine sáıkes, 2017 jyly Qazaqstan men Qyrǵyzstan arasyndaǵy ekijaqty taýar aınalymynyń kólemi 750 mln dollardan asyp jyǵylǵan. Buǵan qosa, Qazaqstan Qyrǵyzstannyń jetekshi saýda-ekonomıkalyq jáne ınvestıtsııalyq seriktesteriniń biri sanalady. Qazaqstan eksportynda ósimdik ónimderi, astyq, un jáne kondıterlik ónimder, metall buıymdary, kómir men turmystyq tehnıka basym. Al Qyrǵyzstan bolsa Qazaqstanǵa aýyl sharýashylyǵy ónimderin, jemis-jıdekter men kókónister, maqta-mata buıymdaryn jetkizedi.
Forýmda Qazaqstannyń Qyrǵyzstandaǵy Elshiliginiń keńesshi-elshisi Almat Toekın qazaqstandyq tarap eki eldiń arasyndaǵy qazirgi taýar aınalymy deńgeıin jylyna 1 mlrd dollarǵa deıin jetkizýge múddelik tanytatyndyǵyn jáne ol úshin barlyq múmkinshiliktiń bar ekenin basa aıtty.
«Bul jolǵy kezdesý ekijaqty qarym-qatynasty damytýǵa qaraı taǵy bir qadam jasaýǵa múmkindik beredi. Bizdiń elderimizdiń dástúrli turaqty ekoonomıkalyq baılanystary tyǵyz saıası yntymaqtastyqpen de nyǵaıa túsken. 2018 jyldyń ishinde ǵana Qazaqstan men Qyrǵyzstan Prezıdentteri 8 ret kezdesti. Bul elderimiz ben halyqtarymyzdyń arasyndaǵy baýyrlastyq qarym-qatynasty dáleldep, saýda-ekonomıkalyq baılanystardy tereńdetýge yntalandyra túsedi», - dedi A.Toekın.
Qazaqstan Qyrǵyzstanmen sý-energetıka salasy, aýyl sharýashylyǵy, kólik jáne kommýnıkatsııalar, taý-ken óndirý, óńdeý ónerkásibi jáne týrızm syndy basymdyqqa ıe salalarda yntymaqtastyqty jandandyra túsýge múddeli. Al Qyrǵyzstannyń Investıtsııany ilgeriletý jáne qorǵaý agenttiginiń dırektory Shýmkarbek Ádilbekuly óz kezginde Qyrǵyzstan úshin qazaq eliniń tartymdy salalaryna atady.
«Bizge paıdaly qazbalardy tek qana óndirý ǵana emes, sonymen birge qaıta óńdeý salalaryndaǵy jobalar qyzyqtyrady. Sonymen qatar aýyl sharýashylyǵy daqyldaryn tereń óńdeý, ony Qytaı men EAEO elderine eksportqa shyǵarý salalaryna ınvestıtsııa salý nazar aýdartady. Búgingi kúni jańa ınnovatsııalyq tehnologııalar salasyndaǵy jobalardyń qajettiligi ótkir baıqalady. Bul baǵyt qazaq bıznesi úshin tamasha múmkinshilik bola alar edi», - dedi Á.Shýmkarbek.
Alǵashqy kezdesý qorytyndysynda Qyrǵyzstannyń Saýda-ónerkásip palatasy men Qazaqstannyń syrtqy saýda palatasy arasynda qyrǵyz-qazaq iskerlik keńesin qurý týraly memorandýmǵa qol qoıyldy. Munan bólek, eki eldiń kásipkerleri arasynda da birqatar kelisim rásimdeldi.
